Беслан оскуолатыгар саха тойуга дьиэрэйдэ, хомус тыаһа дьүрүһүйдэ

Саха култууратын пропагандиһа, СӨ култууратын туйгуна, фольклорист Варвара Обоюкова Северная Осетия Өрөспүүбүлүкэ Беслан куоратыгар 2-с №-дээх оскуолаҕа анал ыалдьыт быһыытынан ыҥырыллан, оҕолорго, учууталларга саха норуотун туһунан билиһиннэрдэ.

Варвара Валерьевна саха төрүт култууратын тойук, дэгэрэҥ ырыа, оһуохай уонна хомус нөҥүө тириэртэ. Барытын бэйэтэ толорон, саала муҥунан толору мустубут көрөөччүлэри сөхтөрдө. Көрсүһүү түмүгэр Беслан оҕолоро учууталларын кытта оһуохайдаан эргийдилэр, салама баайан саха норуотугар чугас буоллулар, урут билбэтэхтэрин биллилэр, истибэтэхтэрин иһиттилэр уонна барҕа махтайдылар.

Бу тэрээһини Варвара Обоюкова РСФСР, Саха АССР норуодунай артыыһа, учуутал, настаабынньык, П.А. Ойуунускай аатынан госбириэмийэ лауреата Гавриил Колесов сырдык кэриэһигэр анаата.

Салгыы Саха сириттэн тиийбит ыалдьыт Владикавказ куоракка Осетия профессиональнай муусукатын төрүттээччи Борис Галаев кэриэһигэр кини олорбут дьиэтигэр мемориальнай бэлиэ арыллыытыгар кытынна.

Борис Галаев осетия норуотугар фольклору хомуйааччынан, бастакы духовой оркестры тэрийээччинэн биллэр, киэҥник ытыктанар. Кини бастакы хардыыларын куорат пааркатыгар оонньооһунтан саҕалаабыта. Салгыы Ленинградтааҕы консерваторияҕа анал идэни баһылаабыта.

Галаев «Фатима», «Чермен», онтон да атын сэбиэскэй киинэлэргэ муусукалары айбыт ааптарынан биллэр. Кининэн биир дойдулаахтара киэн тутталлар. Ол курдук, ытык киһи төрөөбүтэ үбүлүөйдээх сылыгар сырдык аатын үйэтитэр аналлаах ахтыы тэрээһиннэрэ ыытылыннылар. Маныаха барытыгар Варвара Обоюкова сырытта, саха култууратын кытта билиһиннэрдэ.

Тэрийээччилэр — А.Г. Галати аатынан култуура пуондата Варвара Валерьевнаҕа уонна Арассыыйа атын регионнарыттан кэлбит ыалдьыттарга дириҥ ытыктабылларын уонна махталларын биллэрдилэр.

Анфиса Слепцова,
РФ суруналыыстарын сойууһун чилиэнэ.