27 Ыам ыйа 27.05
  • 23°
  • $ 89,7
  • 97,1

Бэс ыйын 1 күнүттэн «Азия Оҕолоро» оонньууларын култуурунай бырагыраамалара саҕаланыахтара

Хаартыска: Саха парламент саайт
Читайте нас на
Яндекс Новости
ЯДВ

«Азия Оҕолоро» VIII оонньуулар иитинэн, Дьокуускай куоракка 50-тан тахса култуурунай тэрээһиннэр ыам ыйын 1 күнүттэн от ыйын 6 күнүгэр диэри ыытыллыахтара. Бу туһунан, СӨ култуураҕа уонна духуобунай сайдыыга миниистирэ Афанасий Ноев иһитиннэрдэ.

«СӨ култуураҕа уонна духуобунай сайдыыга министиэристибэтэ, итиэннэ, тустаах тэрилтэлэр бэлэмнээбит «Азия Оҕолоро» VIII оонньууларын култуурунай бырагырааматын тэрийэр кэмитиэт бигэргэттэ. Бырагыраамаҕа өрөспүүбүлүкэ 22 оройуонуттан үс тыһыынчаттан тахса киһи кыттыыны ылыаҕа – оҕолор, ыччаттар, артыыстар, айар кэллэктииптэр. Тэрээһиннэр бэс ыйын 1 күнүттэн «Арассыыйа – Мин устуоруйам» устуоруйа пааркатыгар «Идиэйэттэн саҕалаан «Азия Оҕолоро» оонньууларын устуоруйатыгар» диэн быыстапкаттан саҕаланыахтара. Экспозиция Бастакы Бэрэсидьиэн М.Е. Николаев көҕүлээһининэн тэриллибит «Азия Оҕолоро» оонньуулар устуоруйатын кэпсиэ, дьоруойдарын билиһиннэриэ. Быыстапка сайыны быһа туруоҕа», — диэн эттэ Афанасий Ноев.

Маны сэргэ, оонньуу чэрчитинэн, СӨ Национальнай худжественнай түмэлэ Санкт-Петербурдааҕы Судаарыстыбаннай Нуучча түмэлин кытары кыттыһан «Айвазовскай уонна улуу нуучча маринистара» диэн быыстапканы туруоруохтара.

Дьокуускай болуоссаттара култуурунай тэрээһиннэр ыытыллар балаһааккаларынан буолуохтара. Оонньуу кыайыылаахтарын чиэстээһин, сибэкки церемонията ыытыллар Хомсомуол болуоссатыгар улахан кэнсиэртэр уонна көрдөрүүлэр ыытыллыахтара. Орджоникидзе болуоссатыгар оҕо кэллэктииптэрэ кэнсиэртиэхтэрэ, норуот маастардарын быыстапкалара, итиэннэ, аан дойдутааҕы «Кинигэ тыала» быыстапка туруохтара уонна «Дьокуускай ыалдьыттары көрсөр» бырагыраама ыытыллыаҕа. Маны таһынан, Опера уонна балет тыйаатырын иннигэр, Доҕордоһуу болуоссатыгар араас кэнсиэртэр буолуохтара.

«Азия Оҕолоро» VIII оонньуулары үөрүүлээхтик арыйыы бэс ыйын 26 күнүгэр Н.Н. Тарскай аатынан «Туймаада» стадиоҥҥа ыытыллыаҕа. Үөрүүлээх тэрээһин сүрүн уус-уран салайааччыта Андрей Борисов айар бөлөҕүн кытары кэрэхсэтиилээх көрдөрүүнү бэлэмниир. Көрөөччүлэри үс чаастаах бырагыраама күүтэр: спортсменнар дэлэгээссийэлэрин уонна кыттар дойдулар былаахтарын параада, ырыа-үҥкүү, итиэннэ, биллиилээх артыыстар кыттыахтара. «Аартыка куйаарыгар айан» диэн тиэмэ Оонньуулары үөрүлээхтик арыйыы сүрүн тиэмэтинэн буолуо.

«Азия Оҕолоро» VIII аан дойдутааҕы оонньуулар бэс ыйын 25 күнүттэн ыам ыйын 7 күнүгэр диэри Дьокуускай куоракка ыытыллыахтара диэн СӨ Ил Дарханын уонна Бырабыыталыстыбатын пресс-сулууспата санатар.

Следите за самым важным и интересным в Telegram-канале и WhatsApp-группе ЯСИА