Горнай оройуонун Бэрдьигэстээх сэлиэнньэтигэр Кыайыы болуоссатыгар Аҕа Дойду Улуу сэриитин геройдарын кэриэстээн Үйэлээх уоту уматтылар. Бу туһунан «Аҕа дойдуну Көмүскээччилэр» судаарыстыбаннай пуонда Саха сиринээҕи филиалыгар иһитиннэрдилэр.

Анал байыаннай дьайыы (СВО) бэтэрээнэ Геннадий Алексеев Үйэлээх уоту уматта. «Бу историческай событиеҕа кыттар улахан чиэс. Үйэлээх уот аҥаардас символ буолбатах, Аҕа дойдуну көмүскээччилэр көлүөнэлэрин икки ардыларыгар ситим. Биһиги эдэр ыччакка эһэлэрбит, аҕаларбыт хорсун быһыыларын өйдөбүлүн тиэрдиэхтээхпит», — диэтэ.

СВО бэтэрээнэ Вахид Рамиз оглы Гадимов салалтатынан эдэр армеецтар Үйэлээх уокка сибэкки гирляндатын уурдулар.

Санатар буоллахха, быйыл күһүн Дьокуускайга «Кыайыы Уоттара» акция чэрчитинэн эдэр армеецтар бэтэрээннэргэ Үйэлээх уот тыына иҥэриллибит лампадкаларын бэлэхтээбиттэрэ. Кинилэргэ өйдөбүнньүк, Кыайыы бэлиэтин быһыытынан үрүҥ хризантемалары туттарбыттара.