14 Атырдьах ыйа 14.08
  • 16°
  • $ 60,9
  • 62,54

Белгород уобалаһыгар Амматтан төрүттээх саллааттар ааттарын үйэтитэллэр

15:01, 22 апреля 2021
Текст:

Белгород уобалаһыгар Аҕа дойду Улуу сэриитин хонуутугар охтубут Амматтан төрүттээх саллааттар ааттарын үйэтитэллэр. Бу туһунан Амма улууһун дьаһалтата иһитиннэрэр.


Бу күннэргэ улуус делегацията баһылык Николай Архипов салайааччылаах Белгород уобалаһыгар сылдьар. Улуу Кыайыы 75 сылын көрсө манна Амматтан төрүттээх саллааттар ааттара биллибит.

Корочанскай оройуонун Шляхово нэһилиэгэр икки саллаат көмүллэ сытара биллибит. Константин Федотович Матвеев, 1907 с.т., Амма нэһилиэгин олохтооҕо, 2-с мотострелковай полк рядовой саллаата. Сэриигэ 1941 сыллаахха Чурапчытааҕы байыаннай комиссариатынан ыҥырыллыбыт. Николай Петрович Окороков, 1914 с.т., Соморсун нэһилиэгиттэн төрүттээх, 21-с мотострелковай биригээдэ рядовойа, Чурапчытааҕы байыаннай комиссариатынан ыҥырыллыбыт. Саллааттар иккиэн 1942 сыл олунньу 14 күнүгэр өлбүттэр.

Маны таһынан делегация Мазикино нэһилиэгэр саллааттар бырааттыы көмүллүбүт уҥуохтарыгар, онтон Яблоново нэһилиэккэ саха саллаата Афанасий Михайлович Никифоров (1913 с.т., Болугуртан төрүттээх, сэриигэ 1941 сыллаахха ыҥырыллыбыт, 1943 сыл бэс ыйын 15 күнүгэр өлбүт) уҥуоҕар сырыттылар.

Аммалар биир дойдулаахтарын уҥуохтарыгар төрүт буордарын, алаадьы, сибэкки хааллардылар.

Николай Архипов 1942-1943 с.с. Белгород уобалаһыгар охтубут өссө биэс саллаат аата мемориалга үйэтитиллиэ диэтэ.

Улуус баһылыга Белгород уобалаһын байыаннай комиссариатын кытары салгыы үлэлэһэр туһунан сөбүлэҥ туһэрсиэ.

Следите за самым важным и интересным в Telegram-канале и WhatsApp-группе ЯСИА
0
0