Уус-Алдан улууһугар, Бэйдиҥэҕэ, Колумбияттан кэлбит дьон тахса сырыттылар. Ыраахтан кэлбит ыалдьыттар айылҕаҕа тахсан тоҥуу хаары тэбистилэр, ыраас салгынынан дуоһуйа тыыннылар, тыа сирин дьонун-сэргэтин олоҕун-дьаһаҕын, күннээҕи түбүгүн билистилэр.
Киэһэ «Түһүлгэ» сынньалаҥ киинигэр нэһилиэктэр уус-уран самодеятельноска бастыҥ кэллэктииптэрин кытта кэнсиэргэ кытыннылар. Бу туһунан нэһилиэк баһылыгын солбуйааччы Светлана Егорова иһитиннэрдэ.
«Былырыын Ньурбаҕа «Хотугу кустук» норуоттар икки ардыларынааҕы фольклор бэстибээлигэр биһиги улууспутуттан «Эр модун» диэн эр дьон үҥкүүһүттэрин бөлөҕө кыттан Гран-при хаһаайынынан буолбута. Онтон быйыл бэстибээл Дьокуускайга ыытылынна. Онно Колумбия Богота куоратыттан «Текендама» фольклор кэллэктиибэ кэлэн кытынна. Кинилэр интэриниэтинэн «эр модуннары» көрөн сөхпүттэр, хайҕаабыттар уонна былырыыҥҥы кыайыылаахтары кытта хайаан да сирэй көрсөн төннөргө быһаарыммыттар. Онон анаан-минээн Бэйдиҥэҕэ тахса сырыттылар», — диэн кэпсээтэ.
Үөрүүлээх дьоро киэһэ «Чугдаанчык» («Чэчир» оҕо саада), «Долгураҥ» фольклор, «Ырыа уонна сибэкки», «Модун» ырыа ансаамбыллара, «Сардаҥа» бэтэрээннэр бальнай, «Кустук», «Тэтим» оскуола оҕолорун, «Эр модун» 40-тан үөһэ саастаах эр дьон үҥкүүһүттэрин бөлөхтөрө кыттыбыттар. Норуот маастара Ольга Колодезникова салайар «Оһуор ойуу» куруһуок бастыҥ оҥоһуктарын быыстапката тардыллыбыт. Маны сэргэ, кини уһуйбут үөрэнээччилэрин Анастасия Охлопкованы, Иван Окоемовы кытта тикпит сахалыы таҥастарын ыалдьыттар улаханнык кэрэхсээбиттэр, кэтэн хаартыскаларга түспүттэр.
This post was published on 24.03.2016 12:37 12:37