Муус устар 12, 13 күннэригэр «Тускул» оҕо айымньытын киинэ уонна Саха Өрөспүүбүлүкэтин оҕолорун уопсастыбаннай холбоһуктарын сойууһа Н.И.Бойлохов аатынан оҕо ускуустубатын дьиэтигэр уһулуччулаах судаарыстыбаннай уонна бэлитиичэскэй диэйэтэл И.Н.Бараахап төрөөбүтэ 125 сылыгар аналлаах III-с өрөспүүбүлүкэтээҕи «Басхан-2023» дьыалабыай оонньууну (куонкуруһу) тэрийдилэр.
«Басхан» дьыалабыай оонньуу быйыл улууска онус төгүлүн, онтон өрөспүүбүлүкэ таһымыгар үһүс сылын ыытыллар. Тэрээһин сүрүн сыалынан уол оҕону киэҥ эйгэҕэ таһаарыы, билиһиннэрии уонна уопсастыбаҕа уол оҕо оруолун үрдэтии буолар.
Куонкуруска Ньурба, Мэҥэ Хаҥалас, Горнай, Амма, Кэбээйи уонна Үөһээ Бүлүү улуустарыттан уопсайа 9 басхан уол кыттыыны ыллылар. Кинилэр, үгэс быһыытынан, биэс түһүмэҕинэн илин-кэлин түһүстүлэр. Ол курдук, «Удьуор утума», «Дойду салайааччылара мин тус бэйэм көрүүбүнэн», «Өркөн өй» – блиц ыйытыктарга хоруй, «Куолулааһын» уонна «Айыы умсулҕана» – талан ылбыт хоһоону ситэрии.
Тэрийээччилэр бэлиэтииллэринэн, уолаттар бары түһүмэхтэри этэҥҥэ ааһан, бэлэмнээхтэрин, дьулуурдаахтарын уонна хорсуннарын көрдөрдүлэр. Оонньуу таhынан кыттааччыларга Үөһээ Бүлүү улууһун бэлиэ, ытык сирдэрин көрдөрөн, төрөөбүт түөлбэ историятын, уратытын, ситиһиилэрин билиһиннэрдилэр. Маны таһынан уолаттар улуус баһылыгын солбуйааччылара Семен Михалевтыын уонна Люция Тойтоновалыын «Саха омук эрэлэ – эр киһи» диэн тиэмэҕэ «төгүрүк остуол» тула мустан, истиҥник кэпсэттилэр.
Семен Анатольевич ыччаттарга оҕону иитии дьиэ тэлгэһэтиттэн саҕаланарын олус интэриэһинэйдик кэпсээтэ. Бииргэ төрөөбүт алта уол бары үрдүк үөрэхтэнэн, үлэһит дьон буолан, Далыр нэһилиэгэ биир холобур оҥостор ыала буоллалларын бигэргэттэ. Хайдах буһан-хатан, хатарыллан үлэһит дьон ситэн тахсыбыттарын туhунан сиһилии сырдатта.
Онтон Люция Спиридоновна уолаттары кытта кэпсэтиини «патриот диэн кимий?» ыйытыыттан саҕалаата. Кини саа-саадах тутан сэриилэһэ эрэ сылдьар киһи буолбатаҕын, ордук төрөөбүт сирин-уотун, дойдутун ытыктыыр уонна ис сүрэҕиттэн таптыыр киһи патриот дэнэр кыахтааҕын тоһоҕолоон бэлиэтээтэ. Маны таһынан хас биирдии киһи бэйэтин дойдутун ааспыт суолун дьэҥкэтик билэрэ, ону сыаналыыра, ол суолтатын өйдүүрэ, итиэннэ кэлэр кэскили түстэһэр чөл өйдөөх-санаалаах буолара кэрэхсэнэрин санатта.
Кыттааччы, салайааччы, ыалдьыт эрэ барыта тэрээһин истиҥ эйгэлээҕин, сайдар кэскиллээҕин бэлиэтээтэ. «Саха уоланнара бас-көс дьон буолан тахсалларыгар сүдү улахан суолталаах, билиҥҥи кэмҥэ олус наадалаах оонньуу буолар», – диэн бары биир киhи курдук бигэргэттилэр.
«Басхан-2023» дьыалабыай оонньуу үрдүк таһымҥа ыытыллыбытынан, кыттааччы уолаттар оҕо саастарыгар биир суолталаах үктэл буолбутунан тэрийээччилэр ааттарыттан үтүө дьаһалга ис сүрэхтэринэн ылынан, өйдөөн кыттыспыт дьоҥҥо, чуолаан Саха Өрөспүүбүлүкэтин ыччат дьыалатын уонна социальнай коммуникацияларга миниистиригэр Петр Виталиевич Шамаевка, Саха Өрөспүүбүлүкэтин үөрэҕин уонна наукатын миниистиригэр Ирина Павловна Любимоваҕа, Үөһээ Бүлүү улууһун дьаһалтатыгар – Люция Спиридоновна Тойтоноваҕа уонна Семен Анатольевич Михалевка, Харбалаах нэһилиэгин баһылыгар Константин Данилович Платоновка, Үөһээ Бүлүүтээҕи И.Н.Барахов аатынан судаарыстыбаннай түмэл научнай үлэһитигэр Евдокия ПавловнаСеменоваҕа, Үөһээ Бүлүүтээҕи оҕо библиотекатын сүрүн библиотекарыгар Майя Федоровна Захароваҕа, уон сыл бэриниилээхтик дьүүллүүр сүбэ бэрэссэдээтэлинэн үлэлиир Алексей Васильевич Руфовка, алгысчыт Трофим Васильевич Мироновка уонна түһүмэх аайы уларыйа сылдьан үлэлээбит эспиэрдэргэ – оскуола дириэктэрдэригэр, тэрилтэ салайааччыларыгар уол оҕону иитиигэ сэмэй кылааккыт иһин истиҥник махтанабыт уонна инникитин бииргэ үлэлэһэргэ ыҥырабыт.
Өссө төгүл «Басхан-2023» уол оҕо дьыалабыай оонньуута (куонкуруһа) «“Эркээйи эргиирэ”: оҕо уонна ыччат сайдар эйгэтин тэрийии» бырагыраамата олоххо ыпсыытын чэрчитинэн салгыы сайдан, өрөспүүбүлүкэ уолаттарын түмэр киэҥ түһүлгэҕэ кубулуйуо диэн эрэнэбит. Кыайыылаах уолаттарга инникитин өссө үрдүк ситиһиилэри баҕарабыт!
КУОНКУРУС ТҮМҮГҮНЭН КЫАЙЫЫЛААҔЫНАН УОННА АНАЛ ААТ ХАHААЙЫННАРЫНАН ААТТАННЫЛАР:
КЫЛААН КЫАЙЫЫЛААХ аатын Юрий Дмитриевич Павлов, Мэҥэ-Хаҥалас улууһун Хаптаҕай орто оскуолатын 10 кылааһын үөрэнээччитэ ылла. Үөһээ Бүлүү улууһун дьаһалтата олохтообут 30 000 солк. суумалаах сертификатын тутта.
I ҮРДЭЛ КЫАЙЫЫЛААҔА –Дьулус Арнольдович Андреев, С.П. Данилов аатынан Бэрдьигэстээх орто оскуолатын 9 кылааһын үөрэнээччитэ. «Тускул» оҕо айымньытын киинэ туруорбут 10 000 солк. суумалаах сертификатын тутта.
II ҮРДЭЛ КЫАЙЫЫЛААҔА – Виталий Афанасьевич Баишев, Кэбээйи улууһун Мастаах орто оскуолатын 10 кылааһын үөрэнээччитэ. «Тускул» оҕо айымньытын киинэ анаабыт 10 000 солк. суумалаах сертификатын тутта.
III ҮРДЭЛ КЫАЙЫЫЛААҔА – Артем Александрович Яковлев, академик Л.В.Киренскэй аатынан Амматааҕы лиссиэй 9 кылааһын үөрэнээччитэ. Саха Өрөспүүбүлүкэтин оҕолорун уопсастыбаннай холбоһуктарын сойууһун бэрэсэдээтэлэ Г. И. Охлопков олохтообут кинигэтин уонна «Көмүлүөк» хампаанньаттан саха иһитин наборун тутта.
«КЫАЙЫЫГА ДЬУЛУУР» – Григорий Николаевич Барабанскай, П.С. Егоров аатынан Ньурба улууһун Акана орто оскуолатын 8 кылааһын үөрэнээччитэ.
«ХОМОҔОЙ ТЫЛ БАСХАНА» – Кристьян Иванович Николаев, Н.Г.Золотарев аатынан Харбалаах орто оскуолатын 9 кылааһын үөрэнээччитэ.
«САЙДАМ САНА БАСХАНА» – Данил Николаевич Захаров, Т.И.Петров аатынан Өргүөт орто оскуолатын 11 кылааһын үөрэнээччитэ.
«УДЬУОР УТУМУН САЛГЫЫР БАСХАН» – Владимир Евсеевич Прокопьев, М.А.Алексеев аатынан Үөһээ Бүлүү өрөспүүбүлүкэтээҕи лиссиэй-интэринээт 9 кылааһын үөрэнээччитэ.
«КЭСКИЛЛЭЭХ КЫТТААЧЧЫ» – Станислав Александрович Борисов, Үөһээ Бүлүү улууһун Быракаан сүрүн оскуолатын 9 кылааһын үөрэнээччитэ.
Үөһээ Бүлүү улууһун «Тускул»
оҕо айымньытын киинин матырыйаалынан
Саха Өрөспүүбүлүкэтин оҕолорун
уопсастыбаннай холбоһуктарын
сойууһун пресс-киинэ
