Ааспыт бээтинсэҕэ Бүлүү улууһун Балаҕаччытыгар «Мастаах-Агро» сүөһүнү астыыр-үөллүүр сыаҕын уонна «Мастаах» кэпэрэтиип киэҥ-куоҥ гарааһын, офиһын арыйыы үөрүүлээх сиэрэ-туома ыытылынна.
Үөрүүлээх тэрээһиҥҥэ улуус дьаһалтатын баһылыгын бастакы солбуйааччы Иван Евсеев, тыа хаһаайыстыбатын департаменын салайааччы Павел Иннокентьев, департамен үлэһиттэрэ кытыннылар.
«Мастаах-Агро» уонна «Мастаах» кэпэрэтиип саҥа тутууларын тыа хаһаайыстыбатын департаменын салайааччы Павел Иннокентьев билиһиннэрдэ:
-Элбэх ынах сүөһүлээх үс нэһилиэк олохсуйбут Мастаах түөлбэтигэр сүөһүнү астыыр-үөллүүр сыаҕы тутууну уруккуттан былаанныыр этибит. Бырайыага оҥоһуллан, тэрилэ атыылаһыллан, дьиэтэ тутуллан сыах үлэҕэ киирдэ.
Анастасия Кырбасова салайааччылаах «Мастаах-Агро» сүөһүнү астыыр-үөллүүр сыаҕын тутуутун сууматын 70% улуустан үбүлэннэ, тэрилтэ хаалбыт 30% уйунна. «Мастаах-Агро» тэрилтэҕэ үс чугастыы сытар «Мастаах», «Кыргыдай» уонна «Хаҕын» тыа хаһаайыстыбатын оҥорон таһаарар кэпэрэтииптэрэ, бөдөҥ бааһынай хаһаайыстыбалар киирэллэр.
Сүөһүнү астыырга элбэх тэриллээх сыаҕы былырыын күһүн үлэлэппиттэрэ, 50 тахса сүөһүнү астаабыттара. Ол кэннэ тэрилин өссө эбэн, тутуутун кэҥэтэн, ситэрэн ааспыт нэдиэлэ бүтүүтэ үөрүүлээх арыйыы тэрилиннэ. Өрүс уҥуор бастакы сыахха күҥҥэ 10 сүөһүнү астыыр-үөллүүр кыах баар.
Итини сэргэ, Максим Яковлев салайааччылаах «Мастаах» тыа хаһаайыстыбатын оҥорон таһаарар кэпэрэтиибэ үс боксалаах улахан гарааһа, офиһа үлэҕэ киирдэ. Гарааһы тутууга улуус эмиэ элбэх үбү көрбүтэ.
Билиҥҥи сокуонунан, тиэхиньиическэй регламенынан сүөһү этэ астыыр-үөллүүр сыаҕы астаннаҕына эрэ атыыга тахсара көҥүллэнэр. Бүлүү өрүс бэтэрээ өттүгэр «Сыа Бүлүү» кэпэрэтиип Өкүндүгэ сүөһүнү астыыр-үөллүүр пууна күһүн үлэлиир, быйыл өрүс уҥуор Мастаах эҥэригэр улууска иккис сыах үлэҕэ киирдэ. Инникитин Күүлэт эҥэригэр биир астыыр-үөллүүр сыаҕы тутуохтаахпыт, тыа хаһаайыстыбатын министиэристибэтэ.
