«Симэх» национальнай галереяҕа Бүлүү улууһун удьуор уус Степановтар дьиэ кэргэттэрин быыстапката үлэтин саҕалаата. Быыстапка Балаҕаччы нэһилиэгэ төрүттэммитэ 250 сылыгар ананар.
«Удьуор Уус» быыстапкаҕа Степановтар алта көлүөнэ дьонун үлэтэ көрдөрүллэр.
Степанов Николай Николаевич — дэгиттэр маастар. Тимиринэн, маһынан, мууһунан уһанар. Быыстапкаҕа эр киһи, дьахтар ыҥыыра, саха быһахтара, хомустара, хаартыскалара көрдөрүүгэ тураллар.
Степанова Анна Николаевна XIX — ХХ үйэлэр саха дьахтарын төрүт таҥаһын — «Кытыылаах сонун», сон киэргэллэрин, мааныга кэтиллэр кэһиэччиктээх халадаай ырбаахылары уо. д.а. илиинэн оҥоһуктары туруорбут.
Алексеева Саргылана Ивановна — Николай Николаевич балта, Анна Николаевна үөрэнээччитэ XVII үйэ кытыылаах уонна оноолоох соннорун көрдөрөр. Быыстапкаҕа кини уолаттарын оҥоһуктара эмиэ бааллар.
Быыстапка А.Е. Кулаковскай аатынан норуоттар доҕордоһууларын дьиэтигэр олунньу 14 күнүгэр диэри үлэлиир.
This post was published on 08.02.2021 17:04 17:04