Бэс ыйын 4 күнүгэр Дьокуускайдааҕы кадеттар интэринээт-оскуолаларын тэлгэһэтигэр Анал байыаннай дьайыыга олохторун толук уурбут байыастар Никон Алексеев уонна Семен Александров кэриэстэригэр өйдөбүнньүк истиэндэлэри астылар, суруйда Саха парламент саайта.
«Хорсунун иһин», итиэннэ «Жуков» мэтээллэрдээх байыаннай дьайыы бэтэрээнэ Никон Константинович Алексеев (1996-2024) уонна «Эр санаа» уордьанынан наҕараадаламмыт гвардии ефрейтэр Семен Владимирович Александров (1998-2022) кадеттар оскуолаларын үөрэнэн бүтэрбиттэрэ. Кинилэр ааттара букатыннаахтык оскуола, Дьокуускай куорат, бүтүн дойду устуоруйатыгар көмүс буукубаларынан сурулуннулар. Бу өйдөбүнньүк истиэндэ эйэлээх олох, дойду кэскилин туһугар сырдык тыыннара быстыбыт байыастарга дириҥ ытыктабылы тиэрдэр бэлиэнэн буолар.
Байыастар кэриэстэригэр өйдөбүнньүгү кадеттар оскуолаларын тэлгэһэтигэр туруорары бииргэ үөрэммит уолаттара, чугас доҕотторо көҕүлээбиттэр. Ол курдук, Иннокентий Яковлев уонна Михаил Винокуров доҕотторун түмэн, сүүрэн-көтөн, кэпсэтэн-туруорсан истиэндэлэри туруорары ситиспиттэр. Маныаха, кадеттар оскуолаларын офицер-иитээччитэ, подполковник Фадей Иванович Никифоров төһүү күүс буолбут.
Дьокуускайдааҕы кадеттар интэринээт-оскуолаларын дириэктэрэ Алексей Александрович Корякин мустубут дьоҥҥо туһаайан тыл эттэ:
— Маннык тэрээһиннэри арыйар, сылдьар хаһан баҕарар ыарахан буолар, тоҕо диэтэххэ, бу кэтэһиилээх, олохпутугар буолуон баҕарбыт дьаһалбыт буолбатах. Ол эрээри, маннык тэрээһиннэргэ биһиги байыастарбытынан киэн туттарбытын уонна ытык иэстэрин эр санаалаахтык, кырдьыктаахтык толорор дьону кытта биир санаалаахпытын көрдөрөбүт. Уолаттарбытыгар бу үтүө хаачыстыбалары төрөппүттэрэ, социум уонна биһиги оскуолабыт иҥэрбиттэрэ.
Күн бүгүн оскуолабыт хас төрдүс бүтэрээччитэ Анал байыаннай дьайыы буола турар сиригэр сылдьар. Быраабы араҥаччылыыр уорганнар үлэһиттэрэ, байыаннай сулууспалаахтар уонна волонтердар быһыытынан дойдуларын туһугар Кыайыыны уһансаллар. Биллэн туран, кинилэр тустарынан сонуннары долгуйа, ытырыктата күүтэбит. Хас биирдии кадеппытын, билигин ханна да буоллун, ахтабыт уонна киэн туттабыт. Оскуолабыт аатын хорсуннук, кырдьыктаахтык уонна бүтэһигэр диэри түһэн биэрбэтэх буойуттары үйэтитэбит.
Выпускниктарбыт Никон Алексеев уонна Семен Александров тустарынан өйдөбүл оскуолабыт баарын тухары тыыннаах. Байыастар кэриэстэригэр истиэндэлэри туруорга этии киирбитигэр бигэ санааны ылынан өйөөбүппүт. Биһиги эр дьону иитэн таһаарабыт, Ийэ дойдуну көмүскүүргэ бэлэм буолуу тыыныгар уһуйабыт. Дойду уонна эйэлээх олох туһугар саамай күндүнү — олоҕу – биэрэр эр санаалаах дьону иитэбит. Онон үйэтитиллибит байыастар хорсун быһыылара, эр санаалара кадеттарбытыгар үтүө холобур буолар. «Сэрииһит буолуу – үйэлэр тухары олоруу» дииллэр… Төрөппүттэргэ, оскуола кэлэктиибигэр маннык дьоһун дьону иитэн таһаарбыттарыгар махтанабын. Чэгиэн доруобуйаны, былыта суох халлааны баҕарабын, уолаттарбытын ахтар-саныыр туһугар уһун үйэлээх буолуоҕуҥ.
Өйдөбүнньүк тэрээһин туһунан сиһилии «Ил Түмэн» хаһыат кэлэр таһаарыытыгар ааҕаарыҥ.
Антонина Неустроева,
Хаартыскалар ааптар түһэриитигэр
This post was published on 06.06.2025 14:06 14:06