Байыаннай дьайыыга сылдьар байыастар Ил Дархаҥҥа уонна Дьокуускайдааҕы 3 №-дээх балыыһа кэлэктиибэр махтал тылларын эттилэр.
«Мэдиссиинэ взводун хамандыырабын, мэдиссиинэ сулууспатын лейтенанабын. Батальон аатыттан УАЗ-санитарка массыынаны биэрбиккитигэр ис сүрэхпиттэн махтанабын. Тимир көлө кэлэн үлэлии сылдьар. Инники кирбиигэ сылдьар уолаттары таһаарыыга абыраата», — диэн мэдиссиинэ сулууспатын лейтенана эттэ. Дьокуускайдааҕы 3 №-дээх балыыһа кылаабынай бырааһа Светлана Давыдова быһаччы быһаарыытынан Саха сириттэн байыаннай дьайыыга сылдьар байыастарга массыынаны ыыппыттара. Кини бу иннинэ коронавирус дьаҥын утары үлэҕэ сүүрбүт «бойобуой» тимир көлө харса суох сүүрүө диэн эппитэ. Массыына олус наадатын кини анал биригээдэни кытта госпитальга үлэлии бара сылдьан билбитэ-көрбүтэ.
This post was published on 10.08.2023 18:22 18:22