Байыаннай дьайыы кыттыылаахтарын оҕолоро бастакы кылааска, орто анал, үрдүк үөрэхтэргэ киирэргэ ураты балаһыанньанан туһаналлар. Бу туһунан брифиҥҥэ үөрэҕирии уонна билим миниистирин бастакы солбуйааччы Михаил Присяжнай эттэ.
“Сайыҥҥы үлэ биир сүрүн хайысхатынан байыаннай дьайыы кыттыылаахтарын оҕолорун бастакы кылааска ылыы буолар. Үөрэхтээһин управлениета байыаннай сулууспалаахтар дьиэ кэргэттэрин оҕолорун кытта биирдиилээн үлэлэһэллэр”, – диэтэ кини.
Билигин орто анал, үрдүк үөрэхтэргэ ылыы бара турар. Михаил Присяжнай санаппытынан, үрдүк үөрэх кыһаларыгар байыаннай дьайыы кыттыылаахтарыгар уонна кинилэр оҕолоругар туспа миэстэ көрүллүбүт – хас биирдии идэ эбэтэр бэлэмниир хайысха төлөбүрэ суох миэстэтин уопсай ахсааныттан 10-ча бырыһыан.
Михаил Присяжнай, Үөрэхтээһин уонна билим министиэристибэтэ “Аҕа дойду көмүскээччилэрэ” Судаарыстыбаннай пуонда филиалын кытта ыкса үлэлэһэллэрин эттэ. “Госпуонда филиалыгар министиэристибэ икки исписэлииһэ үлэлиир”, – диэтэ Присяжнай.
This post was published on 19.08.2024 19:45 19:45