29 Кулун тутар 29.03
  • -11°
  • $ 92,26
  • 99,71

Баатаҕайга тыа хаһаайыстыбатын специалиһа Екатерина Белолюбская үлэтиттэн тохтотулунна

15:03, 04 марта 2016
Текст:
Читайте нас на
Яндекс Новости
ЯДВ

2015 сыллаахха федеральнай бырагырааманан грант ылбыт Петр Сивцев хотонугар кыстаан турбут сүөһүлэр өлбүттэрин туһунан суруйан турабыт. Улуустааҕы ветеринарнай управление начальнига Ирина Васильеваҕа сүөһүлэр өлбүт биричиинэлэрин билээри эрийэ сылдьыбыппар, «Билигин бэрэбиэркэ бара турар. Сүөһүлэртэн ылыллыбыт анаалыс түмүгэ 3-4 хонугунан билиннэҕинэ биирдэ эрэ официальнай иһитиннэрии оҥоһуллар. Мантан ордугу тугу да этэр кыаҕым суох, бырааһынньык кэннэ эрийээриҥ», — диэтэ. 


Уус Алдан улууһун баһылыга Алексей Федотов иһитининнэрбитинэн, туһааннаах хотоҥҥо сүөһү өлүүтүнэн бэрэбиэркэ тута барбыт. «29 төбөнү атын хаһаайыстыбаларынан үллэрдибит. Ветеринарнай управление битэмииннэринэн хаачыйар. Баатаҕай нэһилиэгин дьаһалтатын тыа хаһаайыстыбатынан дьарыктанар специалиһа Екатерина Белолюбская үлэтиттэн тохтотулунна. Билигин улууска баар атын хотоннор, онно кыстыгы туораан эрэр сүөһүлэр туруктарын бэрэбиэркэлээһин ыытыллар», — диэтэ баһылык.

Бэрэбиэркэ түмүгэ тугу көрдөрдө?

Уус Алдан улууһун Хомустаах бөһүөлэгин биир баар суох киэҥ туттар кырдьаҕас фермера Иван Бурнашев бэйэтин күүһүнэн, кыаҕынан 2015 сылга саҥа хотон тутан киллэрэр, сүөһүтүн ахсаанын элбэтэр, билигин 69 төбө сүөһүнү тутан олорор. Сүөһүлэрин күҥҥэ үстэ толору аһатар, иккитэ уулатар. Түөрт үлэһиттээх, сүөһү төбөтүгэр күҥҥэ 500 солкуобайы төлүүр. Сайынын эбии туттарыллыбыт үүттэн 20%-н хамнаска төлүүр. Хотон иһэ ыраас, саахтарын уруккулуу оҕуһу көлүйэн, тута таһааран иһэллэр. Отунан, күөх маассанан хааччыллыбыттар. Хаһаайыстыбатыгар икки МТЗ тараахтырдаах, киэҥ оттуур алаастардаах. Быйыл табыллыннаҕына тыа хаһаайыстыбатын министиэристибэтэ ыытар «Фермер дьиэ кэргэн» граҥҥа киирсэр баҕалаах.

Уус Алдан улууһун Бэрт Ууһун нэһилиэгин эдэр фермерэ Иннокентий Барабанский 2015 сылга тыа хаһаайыстыбатын министиэристибэтиттэн эдэр фермердары өйүүр бырагыраама салаатынан 1,5 мөлүйүөнү ылан, аныгылыы киэҥ, сырдык, ыраас хотону поликарбонат, полистирол матырыйаалларынан туппут. Саҥа трактор уонна 35 төбө сүөһүнү ылбыт. Сүөһүлэр аһыыр отторун саппааһа толору баар. Саҥа хотон туруга үчүгэй, сырдык ыраас, бириэмэтигэр иигэ-сааҕа хомуллар.

Өнөр нэһилиэгин эдэр фермера Виктор Яценко 2015 сылга тыа хаһаайыстыбатын министиэристибэтинэн эдэр фермердэри өйүүр бырагырааманан 1,5 мөлүйүөнү ылбыта. Ол харчытыгар хотон туттар, трактор, от пресстиир уонна 38 төбө сүөһүнү ылан, кыстыгы этэҥҥэ туораан эрэр. Хотоно ыраас, бириэмэтигэр хомуллар, сүөһүлэр күҥҥэ үстэ аһыыллар, отун уонна уутун саппааһа толору.

Суотту нэһилиэгин фермерэ Алексей Петухов 2015 сылга тыа хаһаайыстыбатын министиэристибэтинэн эдэр фермердэри өйүүр бырагырааманан 1,5 мөлүйүөнү ылар. Хотон туттар, техника ылынар, 30 төбө сүөһүнү тутар, 2 үлэһити хамнастыыр. Хотонун иһэ ыраас, сырдык. Аһыыр отун сапппааһа толору баар, уунан толору хааччыллыбыт.

Уус Алдан улууһун Дүпсүн нэһилиэгин эдэр фермерэ Николай Федоров 2015 сылга тыа хаһаайыстыбатын министиэристибэтинэн эдэр фермердэри өйүүр бырагырааманан 1,5 мөлүйүөнү ылан аныгылыы киэҥ, сырдык, ыраас хотону туттар. Хотонугар уота суоҕунан сибээстээн, сырдык киирдин диэн сарайын поликарбонат матырыйаалынан туппут. Саҥа тыраахтыр уонна 28 төбө сүөһүнү ылбыт. Сүөһүлэр аһыыр отторун саппааһа толору баар, күннэтэ чугастыы турар күөлгэ бэйэлэрэ тахсан уулууллар. Саҥа хотон туруга үчүгэй, бириэмэтигэр хомуллар, икки үлэһити хамнас төлөөн үлэлэтэр.

Бэрт Ууһун нэһилиэгин фермера Олег Черкашин 63 төбө сүөһүлээх, улахан саҥа хотонноох. Барытыгар бэйэтин күүһүнэн сылдьар.

Следите за самым важным и интересным в Telegram-канале и WhatsApp-группе ЯСИА