Нэһилиэккэ үөрүүлээх тэрээһиннэр Кыайыы күнүн инниттэн саҕаламмыта. Орто оскуола үөрэнээччилэрэ тыыл, үлэ бэтэрээннэрин кытта көрсүһүүлэриттэн, кинилэргэ Георгиевскай лиэнтэлэри туттарыыттан саҕаламмыта.
Сэрии уоттаах толоонугар охтубуттары, эйэлээх олоххо төннөн кэлэн баран, олох сокуонунан барбыт буойуттары, тыылга сылайары-сындалыйары билбэккэ үлэлээбит дьоммутун кэриэстээн, нэһилиэк аҕам саастаахтара «Уруйдан, Улуу Кыайыы!» диэн кэнсиэри көрдөрдүлэр. Кэнсиэртэн киирбит харчы сахаттан бастакы разведчик Георгий Михайлович Андросовка, баһаарга дьону быыһаары олоҕун толук биэрбит саллаат Нажим Нестеровка бэлиэ өйдөбүнньүктэри оҥорууга барыаҕа.
«Свеча Памяти» акция сылтан сыл ахсын элбэх киһини хабар. Күннэй Слепцова салайааччылаах Ыччат түмсүүтэ бу акцияны сүрүннээбитэ махталлаах дьыала.
Ыам ыйын 9 күнүгэр Баайаҕа Томторун үрдүттэн Кыайыы ырыалара, хоһоонноро дуораһыйаллар. Орто оскуола үөрэнээччилэрэ чиҥник байыаннай хаамыынан чугаһыылар, кэнчээри ыччаппыт эһэлэрин, аҕаларын дьыалаларыгар бэриниилээхтэрин көрдөрөллөр. Уу чуумпуга, сүрэх эрэ тэбэр тыаһыгар, төбөбүтүн төҥкөтөн, дууһалыын иһийэн, сүрэхтиин ытык дьоммутун кытта бииргэ буоллубут.
Нэһилиэк баһылыга Роман Романов истиҥ эҕэрдэтэ, бэтэрээннэргэ махтала мустубут дьону долгутта.
Ити курдук, Баайаҕа нэһилиэгэр Кыайыы күнэ далааһыннаахтык ааста.
