Бааһынай хаһаайыстыба тэринэргэ сир боппуруоһа күүскэ турар

Сир сокуонугар уларытыылар киллэриллэн, 2015 сыл кулун тутар 1 күнүттэн саҥа редакцияламмыт сокуон үлэлиир. Бу докумуону сиргэ сыһыаннаһыыларга реформа быһыытынан ааҕаллар.

Элбэх ыйытыы киирбитинэн, АГАТУ-га фермер үөрэҕин ааһарбар билбиппиттэн кэпсиэм.

Сиргэ быраап көрүҥнэрэ:
— Сирэй бас билии
— Болдьоҕо суох туһаныы
— Төлөбүрэ суох туһаныы
— Аренда
— Хааччахтаах туһаныы

Сирэй бас билиигэ сири ылыыга 11 көрүҥ баар (ст. 39.5 ЗК РФ). Олортон саамай тарҕаммыта — билигин тутта сылдьар сиргин 5 сыл иһигэр сыалынан туһаммыт буоллаххына, сирэй бас билиигэ ылыаххын сөп.

ЛПХ эбэтэр КФХ тэринэн үлэлэтиигэ, муниципалитет (МО) сиригэр-уотугар баар сири төлөбүрэ суох туһаныыга (ст. 39.10 ЗК РФ), сайабылыанньаҕар олоҕуран 6 сылга диэри болдьохтоон биэриэхтэрин сөп.

Өскөтүн киһи МО территориятыгар идэтинэн сүрүн үлэлиир миэстэлээх буоллаҕына, ЛПХ тэринэригэр сири 6 сылтан уһуна суох болдьохтоон биэриэхтэрин сөп. Бу эмиэ төлөбүрэ суох туһаныыга – бу көрүҥҥэ уопсайынан 17 быһаарыы баар.

Ойуур учаастактарыгар тыа хаһаайыстыбатын салаатынан (ол иһигэр тигээйи иитиитинэн) бэйэлэрин туһаларыгар дьарыктаныан баҕалаахтарга сир 5 сылтан элбэҕэ суох уһун болдьоххо эмиэ төлөбүрэ суох бэриллиэн сөп.

Сири олохтоох бэйэни салайыныы уоргана сайабылыанньаҕа олоҕуран быһаарар. Биир учаастакка хас да киһи сайабылыанньалаах буоллаҕына – аукцион биллэриллэр.

Бааһынай хаһаайыстыба тэринэргэ сир учаастагын биэрии кээмэйдэрэ (саамай кыччаабыта уонна улааппыта):

Үүнээйи

1 гектартан итэҕэһэ суох, ити эрээри МО сиригэр баар бааһына иэнин 10%-тан элбиэ суохтаах.

Сүөһү иитиитэ (1 төбөҕө)

0,32 гектар бааһынаттан кырата суох, ити эрээри МО сиригэр баар бааһына иэнин 10%-тан элбиэ суохтаах.

2 гектар оттуур сиртэн кырата суох, ити эрээри МО сиригэр баар оттуур сир иэнин 10%-тан элбиэ суохтаах.

2 гектар мэччирэҥтэн кырата суох, ити эрээри МО сиригэр баар мэччирэҥ иэнин 10%-тан элбиэ суохтаах.

Сылгы иитиитэ (1 төбөҕө)

8 га мэччирэҥтэн кырата суох, ити эрээри МО сиригэр баар мэччирэҥ иэнин 10%-тан элбиэ суохтаах.

1 га ходуһаттан кырата суох, ити эрээри МО сиригэр баар ходуһа иэнин 10%-тан элбиэ суохтаах.

0,1 гектар бааһынаттан кырата суох, ити эрээри МО сиригэр баар бааһына иэнин 10%-тан элбиэ суохтаах.

Сибиинньэни, көтөрү иитии

Нэһилиэк тутуутун былаанын нуорматыгар олоҕурбут кээмэйтэн элбиэ суохтаах.

Тигээйи иитиитэ

0,2 гектартан элбиэ суохтаах.