29 Сэтинньи 29.11
  • -33°
  • $ 60,75
  • 63,3

Бүтэйдээх бары дьиэлэрэ гааска холбоннулар

Бүтэйдээх нэһилиэгин дьиэлэрэ бары гааска холбоннулар. Үөрүүлээх тэрээһиҥҥэ РФ энергетикаҕа миниистирэ Николай Шульгинов уонна Ил Дархан Айсен Николаев кыттыыны ыллылар, суруйда https://edersaas.ru/.

2018 сылтан саҕалаан былырыыҥҥа диэри түөрт сыл иһигэр 15,8 км гаас ситимэ тардыллан нэһилиэк аҥара гаастаммыт эбит буоллаҕынан, быйыл социальнай гаастааһын бырагырааматынан эбии 14,3 км гаас утаҕа тардыллан, хаалбыт 220 дьиэ (барыта 370) күөх төлөҥҥө холбонно.

Айсен Николаев гаас 2018 сыллаахха маҥнай нэһилиэккэ кэлбитин санатта. “Ол эрэн кэккэ биричиинэнэн Бүтэйдээх аҥара эрэ холбоммута. Дойду бэрэсидьиэнэ Путин гаастааһыны тэтимирдэр быһаччы дьаһалыгар олоҕуран, быйыл кылгас кэм иһигэр нэһилиэк толору гаастанна. Социальнай гаастааһын бырагырааматын чэрчитинэн гааһы босхо учаастакка диэри тардан биэрэбит. Быйыл ити курдук өрөспүүбүлүкэҕэ 3000 кэриҥэ ыал гааска босхо холбонуохтара. Ол түмүгэр олохпут-дьаһахпыт уйгута тупсар”, — диэн эттэ салайааччыбыт.

РФ энергетикаҕа миниистирэ Николай Шульгинов этэринэн, гаастааһын бырагыраамата ханна киһи олороруттан тутулуга суох олоҕу-дьаһаҕы тупсарар. Кини бу хайысхаҕа Саха сирэ сөптөөх үлэ ыытарын хайгаата.

Федеральнай министиэристибэ салайааччытын кытта Айсен Николаев 4 оҕолоох Марковтар дьиэ кэргэннэригэр ыалдьыттаан, күөх төлөн гаас оһоххо умайарын илэ көрдүлэр, эдэр ыалы кытта бииргэ үөрдүлэр-көттүлэр.

Социальнай газификацияҕа быйыл барыта 4107 сайаапка киирбит. Быйылгы газовиктар («Сахатранснефтегаз») 2 тыһ. диэри тиэрдэр былааннарын аһара бараннар, 3000 дьиэ күөх төлөҥҥө холбонуохтаах. 2030 сылга диэри барыта 11 тыһ. ыал гааска холбоноро күүтүллэр.

СӨ Ил Дарханын уонна Бырабыыталыстыбатын пресс-сулууспата

Андрей Сорокин, СИА, хаартыската

Следите за самым важным и интересным в Telegram-канале и WhatsApp-группе ЯСИА
0
0