27 Сэтинньи 27.11
  • -42°
  • $ 60,48
  • 62,88

Бүлүү улууһун Тоҕус оскуолатыгар өрөмүөн үлэтэ салгыы ыытыллар

Бүлүү улууһун Евдокия Александровна Степанова аатынан Тоҕустааҕы орто уопсай үөрэхтээһин оскуолатыгар “Оскуола систиэмэтин саҥардыы” федеральнай бырайыагынан оскуоланы өрөмүөннээhин үлэтэ ыытыллар. Дойду Бэрэсидьиэнэ “Биир ньыгыл Арассыыйа” баартыйа сийиэһигэр сорудаҕын иитинэн, 2022 сыллааҕы өрөспүүбүлүкэ оскуолаларын хапытаалынай өрөмүөннэригэр аналлаах бырагыраамаҕа киирэн, үлэ-хамнас күүскэ бара турар.

Дьокуускай куораттан «ИНС» диэн хааччахтаммыт эппиэтинэстээх тэрилтэ 6 мөл. солк. түhэрэн, 23,6 мөл. солк. суумалаах үлэҕэ илии баттанан үлэлии сылдьаллар. Капитальнай өрөмүөн үлэтэ атырдьах ыйын 20 күнүгэр бүтүөхтээх. Өрөмүөну сэргэ тустаах суумаҕа таһынан аныгы ирдэбилгэ эппиэттиир тэрилинэн (оборудование) хааччыйыы эмиэ киирэр.

Оскуола хапытаалынай өрөмүөнүн бырагыраамата материальнай-техническэй инфраструктураны бөҕөргөтүү уонна оскуоланы модернизациялааһын сүҥкэн суолталаах бырайыагынан буолар. Бүлүү улууhун баhылыга Сергей Винокуров, улуустааҕы инженернэй-тутар управление салайааччыта Макар Маисов, нэhилиэкпит баhылыга Акимар Михайлов үлэ сүрүн хайысхаларын ыйан, хайдах үлэ бара туруохтааҕын эрдэ чуолкайдаан мунньах ыыппыттара. Эбийиэккэ тутар-таҥар үлэҕэ “суол каартата” оҥоhуллубута, онон сиэттэрэн үлэ хаамыытын графига оноһуллубута.

Биһиги оскуолабыт 1989 сыллаахха үлэҕэ киирбитэ. Оскуола 2 этээстээх, маhынан тутуллубут. Сылаас килиимэттээх сиргэ аналлаах оскуола тутуутун бырайыага буолан, тымныытынан сөхтөрөр. Кыhынны өттүгэр оскуола 1 этээhэ тымныытынан, элбэх мэhэйдэри көрсөөччубут. Онон бу бырагыраамаҕа хапсыбыппытыттан бары долгуйа үөрэбит.

Оскуолабыт Саха сирин бастакы профессиональнай балерината Евдокия Александровна аатын сүгэр, бу сыл кини 85 сыллаах үбүлүөйүн сыла буолар. Онон оскуола өрөмүөнүн кытта киниэхэ анаан бюст арыйыахтаахпыт. Төрөппүттэр общественнай штабтара муус устартан үлэтин саҕалаабыта. Салайааччы Алена Алексеевна Николаева. Күүскэ ылсан көрөллөр-истэллэр. Өрөмүөҥҥэ бэлэмнэнии саҕаланаатын кытта төрөппүттэрбит, учууталлар, оскуола эр дьон үлэhиттэрэ улахан күүс-көмө буоллулар, бары сомоҕолоһон кылгас кэм иһигэр көстүбүт, онон кинилэргэ махталбыт улахан.

Оскуолабыт 67 үөрэнээччилээх, ыам ыйын 18 күнүттэн дистанционнай үөрэхтээhиннэ көhөн, үөрэх дьылын ыам ыйын бүтүүтэ тумуктээбиппит. Ыам ыйын 18 күнүттэн капитальнай өрөмүөн үлэтэ саҕаламмыта. Ону сэргэ ыам ыйын 31 күнүгэр Саха өрөспүүбүлүкэтин Бырабыыталыстыбатын бэрэссэдээтэлин солбуйааччы Дмитрий Бердников оробуочай хамыыһыйаны кытта кэлэ сылдьыбыта, үлэ хаамыытын көрбүттэрэ-истибиттэрэ. Көрсүһүүгэ нэһилиэк, оскуола салалталара, бэдэрээччит хампаанньа, төрөппүттэр кыттаннар үлэ кээмэйин, болдьоҕун кэпсэппиппит. Уопсайынан, Үөрэҕирии министиэристибэтин уонна улуустааҕы үөрэх управлениетын өттүттэн хонтуруол ыытыллар, онон таһымнаах үлэ бара турар диэн бэлиэтиэм этэ. Өрөмүөн үлэтин үмүрүтэн, күн бүгүн объекка барыта 7 киһи кэлэн үлэлии сылдьар. Көтүрүү үлэтэ түмүктэммитэ. Билигин иһинээҕи үлэтэ бара турар. Оскуола иккис этээhин муостата, истиэнэтэ, үрдүн үлэлэрэ бүтэн эрэллэр. Ис эркини тупсарыы үлэтэ эмиэ сотору түмүктэниэ. Наадалаах тутуу матырыйаала кэмигэр кэлэн иhэр. Өрөмүөн үлэтэ хаачыстыбалаахтык ыытылыннаҕына оҕолор үөрэнэр усулуобуйалара тупсуоҕа. Нэhилиэк олохтоохторо балаҕан ыйын 1 күнүн долгуйа күүтэбит.

Маайыска Тимофеева, Е.А.Степанова аатынан Тоҕус оскуолатын дириэктэрэ.

Олох суола

Следите за самым важным и интересным в Telegram-канале и WhatsApp-группе ЯСИА
0
0