Тутааччы күнүн иннинэ Бүлүү улууһунааҕы тутар-инженернэй управление салайааччыта Владимир Михайлович Степанов улууска ыытыллар тутуу туһунан кэпсээтэ:
«Кэлиҥҥи сылларга улууска тутуу биллэрдик ыытылларын бэлиэтиэххэ сөп. Сүрүннээн “Олорор дьиэни тутуу”, “Үтүө дьыала» бырагыраамлар көдьүүстээхтик үлэлииллэр.
«2013-16 сылларга “Хаарбах дьиэттэн дьону көһөрүү” бырагырааманан ыалга 408 кв тутуохтаахпыт. 2013 сылга 33 кв үлэҕэ киирбитэ, билигин 96 кв дьиэ тутуллан күһүн киириэхтээх. Билигин барыта 8 элбэх кв дьиэ тутулла турар, 162 кв тутуута саҕаланыахтаах.
Өлүүлээн тутуу 2014 сылтан саҕаламмыта, 48 кв үлэҕэ киллэрбиппит, ол иһиттэн 16 кв балыыһа, 16 кв ОДьКХ үлэһиттэригэр анаммыта, 8 кв “Сыа Бүлүү” потребительскай кооператив, 8 кв “Эрэл” ХЭО үлэһиттэригэр туттарбыта. Бүгүҥҥү күҥҥэ култуура үлэһиттэригэр 8 кв дьиэ тутулла турар, быйыл бүтүөхтээх.
“Тулаайах оҕолору дьиэнэн хааччыйыы” бырагырааманан сыл аайы дьиэ тутабыт. 2013 сыллаахха 20 кв, 2014 сылга 24 кв дьиэлэри туппуппут, 2015 сыллааҕы этабынан 24 кв дьиэ тутуута бара турар, 2016 сылга 16 кв тутуутугар аукцион биллэрбиппит.
“Үтүө Дьыаланан” эмиэ элбэх тутуу ыытыллар. Ааспыт сылларга Чинэкэҕэ, Дьөккөҥҥө оҕо уһуйааннара, Лөкөчөөҥҥө кулууп үлэҕэ киирбиттэрэ. Манан билигин 6 эбийиэк тутуллар. Тааһаҕарга эдэр специалистарга 4 кв дьиэ тутулла турарын саҥа сүүрээн быһыытынан көрүөххэ сөп. Өкүндүгэ оскуола, Лөкөчөөҥҥө, Илбэҥэҕэ, II Күүлэккэ оҕо уһуйааннара, I Күүлэккэ , Бороҕоҥҥо кулууп дьиэлэрэ тутуллаллар.
Быйыл улахан эбийиэктэри тутууга хамсааһын таҕыста. Ол курдук, улууска 6 улахан тутуу барар. Дибидиэн үбүнэн Тааһаҕар оскуолатын сыбаайатын баайыы үлэтэ бу күннэргэ түмүктэннэ, Бүлүү к. Культура Дыбарыаһын сыбаайаларын баайыы үлэтэ бара турар, Бүлүү к. “Көтөх” саҥа кварталы итиинэн, уунан хааччыйыахтаах, кыахтаах хочуолунай тутуллар, эмиэ куоракка балыыһа комплексын сыбаайаларын баайыы ыытыллар, спорт саалатын тутуута күүскэ барар, “Молодежнай” дьоҕус оройуоҥҥа оҕо уһуйаанын туталлар.
Тыа хаһаайыстыбатын салаатыгар эмиэ тутуу барар. Ааспыт сылларга Тыымпыга, Чинэкэҕэ, Чочуга ынах сүөһү турар комплекстара үлэҕэ киирбиттэрэ, билигин Халбаакыга, Бөтүҥҥэ эмиэ улахан хотоннор тутуулара ыытыллар.
Олонхо ыһыаҕын тутууларыгар бырайыак оҥорор тэрилтэ быһаарылынна, быйылгыттан үлэтэ саҕаланыахтаах«.
Хаартыскаҕа: спортивнай сааланы тутуу.
