Бүлүү улууһун Тыымпытыгар Выбор Быкалыров сырдык аатыгар А категорияҕа хапсаҕайга өрөспүүбүлүкэтээҕи турнир эр дьоҥҥо уонна уолаттарга ыытыллар. Күрэхтэһии «Азия оҕолоро» VIII норуоттар ардыларынааҕы оонньууларга иккис талар түһүмэҕинэн буолуоҕа, суруйар ЯСИА.
Турнир тохсунньу 20 уонна 21 күннэригэр буолуоҕа уонна хапсаҕайга 2024 сылга бастакы улахан түһүлгэнэн арыллыаҕа.
Эр дьон алта ыйааһыҥҥа уонна муҥутуур кыайыылааҕы быһаарыыга киирсиэхтэрэ.
Тэрийээччилэр быһаарыыларынан, 2009 — 2010 сыллардааҕы төрүөх уолаттарга эмиэ киирсиилэр буолуохтара. Биэс ыйааһыҥҥа тургутууну ааһыахтара. Турнир «Азия оҕолоро» оонньууларга сүүмэрдээһини оҥорор таһымнаах.
«Бастакы талар этаабы алтынньыга ыыппыппыт, хамаанда састааба быһаарыллыбыта, билигин бэлэмнэнэллэр. Тыымпытааҕы турнир иккис этаап буолар. Үһүс этаап олунньу ортото Саха сиригэр бастыыр иһин күрэхтэһиигэ ыытыллыаҕа», — диэтэ ЯСИА-ҕа хапсаҕайга хамаанда начаалынньыга Вячеслав Данилов.
This post was published on 16.01.2024 15:33 15:33