Кэлэр сайын Уус Алдан улууһун Бороҕонугар ыытыллыахтаах Саха сирин норуоттарын VIII спартакиадатыгар Бүлүү улууһун спортсменнара кыттыахтара. Бэлэмнэнии, путевка былдьаһар күрэхтэһиилэр тустарынан улуустааҕы спорт кэмитиэтин бэрэссэдээтэлэ Гаврил Евсеев «Олох суола» хаһыакка кэпсээтэ, суруйда Николай Куприянов.
Гаврил Евсеев иһитиннэрбитинэн, Бүлүү улууһун хамаандатын спортсменнара сайын Уус Алдаҥҥа буолаары турар Саха сирин норуоттарын VIII спартакиадатыгар былаан быһыытынан бэлэмнэниини ааһа, сүүмэрдиир күрэхтэһиилэргэ кыттан, путевкалары былдьаһа сылдьаллар. Улуус өттүттэн үп-харчы сөптөөхтүк көрүллэн, үйэлээх үбүлүөйдээх сыл сүрүн күрэхтэһиитигэр ситиһиилээхтик кыттар соруктаахтар.
«Биллэн турар, спартакиадаҕа кыттар путевкалары 100 бырыһыан ылар сүрдээх ыарахан. Бары улуустар хамаандаларын таһыма сылтан сыл үрдээн иһэрэ көстөр, материальнай-тиэхиньическэй базалара сайдан иһэр, спорт саҥа эбийиэктэрэ үлэҕэ киирэллэр, спортсменнар профессиональнай таһымҥа тахсаллар.
Биһиги хамаандабыт спортсменнара спартакиада сорох көрүҥнэригэр путевката да суох хаалыылара баар, сорох көрүҥнэргэ ыланнар үөрүүлэрэ үгүс. Төһө да күүстээх бастакы бөлөххө баар буолларбыт, Бүлүү улууһун сүүмэрдэммит хамаандата спартакиадаҕа инники күөҥҥэ тахсарга дьулуһуохпут», — диэтэ кини.
Бүлүүлэр саамай эрэнэр көрүҥнэринэн компакт-спортинг, оҕунан ытыы, буулдьанан ытыы, сүүрүү уо.д.а. буолаллар. Биллэр-көстөр спортсменнарыгар эрэллэрэ улахан.
