Бүгүн Ил Дархан э.т. Айсен Николаев “АЛРОСА” АХ бастакы вице-президенин-толорор дириэктэрин Игорь Соболевы, Экология миниистирэ Сахамин Афанасьевы кытары Иирэлээх, Ботуобуйа, Бүлүү даамбаларын кэрийэн көрдүлэр.
Сахамин Афанасьев бэлиэтииринэн, Иирэлээх даамбатын оҥоруу кэмигэр уу ааһар сирин аспыттар, ол түмүгэр кирдээх уу өрүскэ киирбит. “Бу ааспыт кирдээх уу кээмэйэ кыра. Сүрүннээн, өрүс хаҥас биэрэгин диэки баар. Даамба алдьаммытын курдук балысхан уу барбата. Манна даҕатан эттэххэ, бастакы уонна алтыс даамбалары оҥоро иликтэринэ, бу маннык кирдээх уу син биир баар буолуоҕа”, — диэн иһитиннэрэр Сахамин Миланович.
Билигин Иирэлээх Аччыгый Ботуобуйаҕа түһүүтүгэр уу ыраастанан эрэр. Оттон Ботуобуйаттан Сунтаар бөһүөлэгэр диэри уу кирдээх. “АЛРОСА” хампаанньа билигин даамбалары оҥоро сылдьар. Үлэлэрин балаҕан ыйын 8 күнүгэр диэри бүтэрэр былааннаахтар.
Аграфена КУЗЬМИНА, “Саха сирэ” хаһыат.
This post was published on 30.08.2018 15:05 15:05