«Мин ыарахан сыаналаах эмтэниини ааһыахтаахпын. Биэнсийэм уонна хамнаһым онно тиийбэт. Толору куурсу ааһар кыаҕым суох, ол иһин быраастар сэмэлииллэр. Ый аайы Дьокуускайга ыҥыраллар, анаалыс туттарабын. Биһиги сэлиэнньэбит эминэн хааччыллыыта хайдаҕый? Онно туох эмэ көмө миэхэ баар буолар дуо?» — диэн Илбэҥэ олохтооҕо ыйытта. Норуот депутата, Бүлүү киин балыыһатын кылаабынай бырааһа Егор Григорьев эппитинэн, ыйытааччы эмигэр чэпчэтиини туһанарын туһунан суругу көрдөрүөхтээх.
«Бу нэдиэлэҕэ сэлиэнньэҕэ анал гематологическай анализатордаах лабораториялаах саҥа массыына кэлиэхтээх. Хааны уонна ииги анаалыстарга туттарыахха сөп буолар. Быйыл, кууруска үөрэнэн баран, УЗИ бырааһа үлэтин саҕалыахтаах», — диэтэ Григорьев.
Предпринимательство миниистирэ Тимур Ханды ыраас уунан хааччыллыы бырайыагын олоххо киллэриигэ предприниматель ылсан үлэлиэн наада. Кини Илбэҥэни эрэ буолбакка, чугастааҕы нэһилиэктэри эмиэ ыраас уунан хааччыйыан сөп.
«Биһиги нэһилиэнньэни ыраас уунан хааччыйыыга сөптөөх бизнес-былаан оҥоруохпут. Билигин предпринимательствоны сайыннарыы пуондата 5 мөл солк тиийэ кирэдьиит биэриэн сөп, чэпчэтиилээх ыстаапка 8%. АЭБ бааны кытта предпринимателлэргэ чэпчэтиилээх кирэдьиит биэриигэ бырайыак оҥоро сылдьабыт», — диэтэ миниистир.
