Бүлүү оройуонун Лөкөчөөн нэһилиэгин таһыгар баар күөлгэ олохсуйбут сэдэх шипун-куба өллө. Бу туһунан СИА-ҕа Ем.Ярославскай аатынан саха музейын айылҕа харыстабылын отделын научнай үлэһитэ Владимир Бочкарев иһитиннэрдэ.
«Баҕар, олохтоохтор кубаны килиэбинэн аһаппыттара буолуо. Бу аһылык көтөрү өлөрөр. Ону тэҥэ, кубаны массыына багажнигар аҕалбыттара, манна кини тымныйыан сөп», — диэн научнай үлэһит сабаҕалаата.
Санатан эттэххэ, Бүлүү оройуонун Лөкөчөөн нэһилиэгэр соҕотох куба олохсуйбутун туһунан иһитиннэрии нэдиэлэ анараа өттүгэр мессенджердарга тарҕаммыта. Экспертэр этэллэринэн, бу ситэ илик куба этэ. Эдэр кубалар Арҕаа Сибииргэ киэҥник тарҕаналлар, ардыгар сайынын ыраах хоту кэлэллэр, Арктика зонатыгар да тиийиэхтэрин сөп. Ол гынан баран, Саха сиригэр шипун-куба кэлиитэ — сэдэх түбэлтэ.
