Бүтүн Россиятааҕы биэрэпис алтынньы 15 күнүттэн саҕаланар. Бүлүүтээҕи статистика отделын кылаабынай исписэлииһэ Валентина Михайлова иһитиннэрбитинэн, улууска бэлэмнэнии үлэ күүскэ барар.
Валентина Михайлова иһитиннэрбитинэн, биэрэпис иккис түһүмэҕэ алтынньы 15 күнүттэн сэтинньи 14 күнүгэр диэри ыытыллар. Бүлүү куоратыгар биэрэпиһи ыытар сэттэ учаастак үлэлииргэ бэлэм. Куоракка – 20, Кыһыл Сыыр бөһүөлэгэр – 5, федеральнайдааҕы айан суолугар сытар нэһилиэктэргэ биирдии биэрэписчик, итини сэргэ сэттэ хонтуруоллааччы үлэлиэҕэ.
«Алтынньы 15 күнүттэн сэтинньи 8 күнүгэр диэри «Госуслуги» нөҥүө биэрэпиһи ааһыахтарын сөп. Оттон биэрэписчик ыаллары алтынньы 18 күнүттэн кэрийэн барар. Биэрэписчиги дьиэҕэ киллэриэн баҕарбат дьон стационарнай учаастакка кэлэн биэрэпиһи ааһаллар, Мир уулусса 7 №-гэр статистика отделыгар«, — диэтэ кини.
Биэрэписчиктэр бары М.Н.Жирков аатынан култуура Дыбарыаһыгар, санитарнай-эпидемиологическай ирдэбиллэри барытын тутуһан, икки күн устата үөрэннилэр, итини сэргэ отделга биирдиилээн кэлэн эмиэ үөрэнэн бараллар. Бары планшетынан хааччылыннылар, формалара, удостоверениелара барыта бэлэм, суруйда Николай Федоров.
