Ааспыт нэдиэлэҕэ Саха сирин профсоюзтарын бэдэрээссийэтин салайааччы Н.Н. Дегтярев Бүлүү улууһугар сырыытыгар куорат, нэһилиэктэр тэрилтэлэрин үлэлэрин, усулуобуйаларын билистэ. Идэлээх холбоһуктар алын сүһүөх тэрилтэлэрин салайааччыларын кытта көрсөн сиһилии кэпсэттэ.
Бүлүү улууһун дьаһалтатын мунньахтыыр саалатыгар идэлээх холбоһуктар тэрилтэлэрин салайааччыларын кытта тэриллибит көрсүһүүгэ Саха сирин профсоюзтарын бэдэрээссийэтин салайааччы Н.Н. Дегтярев билиҥҥи кэмҥэ профсоюзтар иннилэригэр турар соруктарга тохтоото. Ол эбэтэр социальнай бииргэ үлэлээһиҥҥэ, дьарыктаах буолууга, үөрэхтээһиҥҥэ, үлэ киһитин инники күөҥҥэ таһаарыыга, бүддьүөт үлэһиттэригэр олох-дьаһах өҥөтүн төлөбүрдэрин толуйууга, үлэһит быраабын көмүскүүргэ коллективнай дуогабардары оҥорууга, тыа хаһаайыстыбатын идэлээх холбоһуктарын үлэтин өрө тардыыга уо.д.а.
Стратегическай көҕүлээһин киинэ бүддьүөт тэрилтэлэригэр үлэһит ахсаанын аҕыйатар туһунан этиитэ киэҥник тарҕанан, Саха сирин улуустарыгар айдааны – ыҥырыа уйатын тоҕо тардыбыта биллэр.
Таһымнаах көрсүһүүлэргэ ити боппуруос улуус аайы чуолкайданарын санатыахха сөп. Бу да сырыыга өрөспүүбүлүкэни төрүттэспит С.М. Аржаков аатын сүгэр, сотору кэминэн үбүлүөйүн бэлиэтиэхтээх өрөспүүбүлүкэҕэ бастакы тулаайах оҕолорго көмөлөһөр киин дириэктэрэ Н.Н. Харлампьев оҕо дьиэтэ сабыллыбакка салгыы үлэлиирин туруорсубутугар, Н.Н. Дегтярев боппуруоһу үөрэтиэхтэрин, бастакы оҕо дьиэтэ сабыллыа суохтааҕын эттэ. Кини этиитэ сүбэ быһыытынан эрэ көрүллэрин, Саха сирин баһылыгын э.т. А.С. Николаев оптимизация атын хайысханан ыытыллыахтааҕын тоһоҕолоон бэлиэтээбитин, профсоюзтар бэдэрээссийэлэрэ эмиэ итинник кэриҥнээхтик туруорсарын билиһиннэрдэ.
Мунньаҕы салайан ыыппыт улуус дьаһалтатын баһылыга С.Н. Винокуров оҕо дьиэтэ бүгүҥҥү күҥҥэ үчүгэйдик үлэлиирин бэлиэтээн туран “элбэх биллиилээх дьон үлэлээбит, иитиллэн тахсыбыт кырдьаҕас устуоруйалаах оҕо дьиэтэ сабыллыбатын туһугар кыһаллыахпыт”, — диэн этиитин мустубут дьон өйөөтө.
Көрсүһүүгэ идэлээх холбоһуктар үлэһиттэрин быраабын көмүскээһиҥҥэ, биэнсийэҕэ тахсыы сааһын уларытыы сокуонун барылыгар, докумуоннары сөптөөхтүк толорууга, Сыдыбылга баар кырдьаҕастар доруобуйаларын чөлүгэр түһэрэр профилакторий сабыллыбатыгар элбэх ыйытык киирбитигэр, Саха сиринээҕи профсоюзтар бэдэрээссийэлэрин салайааччы сиһилии быһаарыы оҥордо, сүбэ-ама биэрдэ.
