Г.И.Чиряев аатынан Бүлүүтээҕи 1 №-дээх орто оскуолаҕа өрөмүөн үлэтэ күргүөмнээхтик, эриэ-дэхситик бара турар.
Биллэрин курдук, үгүс кэпсэтиилэр, чопчу туруорсуулар кэннилэриттэн анал федеральнай бырагыраамаҕа киирэн, оскуолаларга капитальнай өрөмүөн үлэтин кэлимник ыытыыга саҥалыы хамсааһын таҕыста. Ол курдук икки сыллаах хас да түһүмэхтэртэн турар капитальнай өрөмүөнү ыытыыга анал федеральнай үп көрүллүбүтэ. Онон бу оскуола капитальнай өрөмүөнүн үлэтин ыытыыга “Сигма” диэн олохтоох тутуу тэрилтэтин (салайааччы С.М.Степанов) кытта дуогабар түһэрсибиттэрэ.
Бу тэрилтэ үлэһиттэрэ бары наадалаах тутуу матырыйаалын булан-талан, хайы-үйэҕэ барытын аҕалан, оскуола икки этээһинэн үлэ бөҕөнү ыыппыттар. Ол туһунан бу оскуола дириэктэрин хаһаайыстыбаннай чааска солбуйааччы Зоя Ивановна Степанованы көрсөн сиһилии туоһуластыбыт. Онуоха кини бу курдук кэпсээтэ:
Биһиги бэйэбит олохтоох уолаттарбыт үлэлии-хамсыы сылдьаллара, барытын сатыыллара, билэллэрэ-көрөллөрө, туохтан да чаҕыйан турбакка, утары оҥорон иһэллэрэ киһини үөрдэр. Тугу этэрбин лоп курдук толороллор, чахчы кыһаллан-мүһэллэн, дьаныһан туран үлэлииллэр, онон табыллыбыппыт диэн бөҕөх санаалаахпын.
Ол курдук кылгас кэм иһигэр дьиэ сарайын көтүрэн, сороҕун хаттаан бүрүйэн, урут сыыһа бырайыагынан оҥоһуллубутун саҥалыы көрөн оҥорору дьүүллэстилэр. Хата, ардах түһэн, ону уу харахтарынан көрөн сүбэлэһии буолла. Саҥа түннүктэри туруордулар, ититэр системаны хаттаан көтүрэн оҥордулар, билигин регистрдары туруоруу хаалла. Уолаттар сварка үлэтин чахчы баһылаабыттар, тутталлара-оҥороллоро түргэнэ-тарҕана үчүгэй, барытын тутатына бүтэрэн-оһорон иһэллэр. Бэйэбит оҕолорбут буоллахтара дии, сахалыы күө-дьаа кэпсэтэрбит да элбэҕи этэр буоллаҕа.
Ол да буоллар билигин да оҥоһуллуохтаах үлэ элбэх, дьэ ол иһин саас-сааһынан аттаран, барытын наардаан иһэллэр. Хонтуруол да баар быһыылаах, сотору-сотору салайааччылара кэлэн, көрөн-истэн, сорудах биэрэн бараллар. Маны сэргэ бетон кутуутугар, шпаклевка, плиткалары сыһыарыы о.д.а. үлэлэргэ хас да наймыламмыт үлэһиттэрдээхтэр.
Онон үлэ күөстүү оргуйар, барыта былаан быһыытынан баран иһэр. Уопсайынан, биһиги эдэр ыччаппыт тутуу үлэтигэр лаппа сыстан, баһылаан эрэрэ киһини олус үөрдэр, инникигэ эрэли үөскэтэр, — диэн түмүктээтэ Зоя Ивановна.
Николай Федоров
