29 Сэтинньи 29.11
  • -33°
  • $ 60,75
  • 63,3

Бүлүү эбэ хаҥас кытылыгар сытар оскуолалар XI Спартакиадалара эһиил Маҥааска буолуоҕа

Үөһээ Бүлүү улууһун Бүлүү эбэ хаҥас кытылыгар сытар оскуолалар икки ардыларыгар үгэс курдук ыытыллар Спартакиада буолла. Бу спортивнай тэрээһин 2007 сыллаахтан тиһигин быспакка ыытыллар. Оччолорго Дүллүкү орто оскуолатын профкомун председателэ Иван Санников, Мэйик орто оскуолатын профкомун председателэ Владимир Федоров уонна Хоро орто оскуолатын профкомун председателэ Валерий Никифоров көҕүлээһиннэринэн бастакы Спартакиада Дүллүкү орто оскуолатыгар ыытыллыбыта.

2007 сылтан күрэхтэһии нэһилиэктэринэн көһө сылдьан сылын аайы ыытыллар. Ол эрэн 2020 сыллаахха, хамсык ыарыы туран, икки сыл тохтуу сылдьан баран, быйыл Хоро орто оскуолатыгар үрдүк тэрээһиннээхтик буолан ааста. 2019 сыллаахха Боотулууга ыытыллыбыт Спартакиада кэмигэр бу күрэхтэһиини салгыы өр сылларга Дүллүкү орто оскуолатыгар учууталынан, профком председателинэн дириҥ хортуулаахтык үлэлээн ааспыт, эдэр эрдэҕиттэн спордунан утумнаахтык дьарыктаммыт Иван Алексеевич Санников аатынан ыытыахха диэн быһаарбыттара.

Балаһыанньа быһыытынан, спорт алта көрүҥэ киирэр: волейбол, остуол тенниһэ, дуобат, саахымат, остуол оонньуута (хабылык, хаамыска) уонна буулдьанан ытыы. Бу көрүҥнэри таһынан тэрийэн ыытар оскуола бэйэтэ эбии атын көрүҥнэри эбэн биэриэн сөп. Ол курдук оскуола профкомун председателлэрин икки ардыгар троеборье уонна профком председателэ уонна оскуола директора “Икки сулус” (Две звезды) дуэттар күрэхтэригэр кытыннылар.  Быйыл саҥа кыттар Хомустаах сүрүн оскуолата туспа хамаанда туруоран  кытынна. Барыта 9 оскуола спорт 8 көрүҥэр илин-кэлин түһүстүлэр.

Уопсай түмүккэ Боотулуу орто оскуолатын хамаандата – бастакы (директор Харбаев С.С., профком председателэ Николаева М.П.), иккис – Хоро орто оскуолата (директор Самсонова Р.В., профком председателэ Хобусаров С.Р.) үһүс – Далыр орто оскулатын (директор Семенов М.Р., профком председателэ Афанасьев Ю.С.) хамаандалара буоллулар.

Эһиилги XI Спартакиада Маҥаас нэһилиэгэр ыытыллара быһаарылынна.

Маннык тэрээһиннэр нэһилиэктэр олохторун сэргэхситэллэр, бу уустук кэмҥэ дьон санаатын көтөҕөллөр. Атын уулустар, нэһилиэктэр Иван Санников курдук биһиги үтүө дьоммут холобурун туһаныахтара диэн эрэнэбит.

Ааптар: Софрон Хобусаров, саха тылын учуутала, Хоро

Следите за самым важным и интересным в Telegram-канале и WhatsApp-группе ЯСИА
11
0
Комментарии
  • Соппуруон:

    Уон бэһис спартакиада диэн көннөрөн ааҕаргытыгар.

  • Халан:

    11-с буолбакка 15-с Спартакиада эһиил буолар үһү.

Комментарии закрыты.