Октябрьскай нэһилиэк олохтоохторо уонна ыалдьыттара бүгүн, сэтинньи 11 күнүгэр, Улуу биир дойдулаахпыт Былатыан Ойуунускай төрөөбүтэ 131 сылыгар аналлаах “Былатыан Ойуунускай — норуот сүрэҕэр” быыстапка аһыллыытыгар кытыннылар.
Быыстапкаҕа норуот уола Былатыан Ойуунускайга анаммыт норуот оҥорбут оҥоһуктара, кини сырдык аатын үйэтитиигэ ылсыбыт кыраайы үөрэтээччилэр, биирдиилээн дьон ахтыылара көрдөрүүгэ туруорулуннулар.
П.А. Ойуунускай аатынан СӨ Судаарыстыбаннаһын музейыгар сарсыарда 10 чаастан дьон тоҕуоруһа муһунна. Бу күн музейга аһаҕас аан күнэ биллэрилиннэ.
Бу күн Чөркөөх орто оскуолатыгар улуус салайааччылара кэлэн Ойуунускай уруогун ыыттылар. Улуус салайааччыларын нэдиэлэтээҕи планеркалара бүгүн музейга буолла. Салгыы уопсастыбаннас кыттыылаах мунньах ыытылынна. Таатта улууһун баһылыгын э.т. Руслан Захаров Былатыан Ойуунускай Таатта, Саха сирин сайдыытыгар сүҥкэн оруолун, оҥорбут дьыалата аныгы олоххо сүдү суолтатын туһунан санаатын эттэ.
Мунньах саҕаланыытыгар В.Б.Окороковаҕа Ойуунускай аатын үйэтитиигэ махтанан туран, улуус баһылыгын э.т. Руслан Захаров «Таатта улууһун сайдыытыгар кылаатын иһин», Октябрьскай нэһилиэк баһылыга Андрей Семенов «Нэһилиэк социальнай -экономическай сайдыытыгар кылаатын иһин» бэлиэни туттардылар.
«Утум» педагогическай түмсүүттэн П.Ф. Кычкина, Чөркөөх орто оскуолатын учуутала Э.Х. Кашкина Чөркөөххө үйэтитии үлэтин кэпсээтилэр.
Салгыы П.А. Ойуунускай төрөөбүт алааһыгар, балаҕаныгар Мунха Дэлбэрийбиккэ сырыттылар.
Ааптар: Светлана Халгаева
This post was published on 11.11.2024 17:05 17:05