«Азия оҕолоро» VIII оонньуулар уотун эстафетатын түмүктүүр түһүмэҕэ бүгүн бэс ыйын 26 күнүгэр сарсыарда 10 чааска Кыайыы болуоссатыгар саҕаланыаҕа. Ол туһунан куорат дьаһалтата иһитиннэрдэ.
Эстафета болуоссаттан саҕалаан, киин уулуссаларынан барыаҕа уонна Доҕордоһуу болуоссатыгар тохтуоҕа. Олохтоохтор уонна ыалдьыттар Оонньуулар сүрүн Бэлиэлэрин кытта опера уонна балет тыйаатырын таһыгар хаартыскаҕа түһүөхтэрин сөп.
Эстафетаҕа 74 факелы тиэрдээччи, ол иһигэр Ил Дархан Айсен Николаев, «Азия оҕолоро» кэмитиэт президенэ Владимир Максимов, Россия Олимпийскай кэмитиэтин президенэ Станислав Поздняков, араас сыллардааҕы «Азия оҕолорун» выпускниктара кытталлар.
Оонньуулар саҕаланаллара 100 хонук иннигэр Өлүөнэ остуолбаларын тэллэҕэр умайбыт уот 37 000 килэмиэтири барда, 35 муниципальнай тэриллиини кэрийдэ.
Оонньуулар саҕаланыыларын сиэрин-туомун ыытыы кэмигэр уоту «Туймаада» стадиоҥҥа аҕалыахтара.
