Спортивнай оонньуу иккис күнэ СӨ чиэһин көмүскүү сылдьар тустууктарга ситиһиилээх буолла. Сэрэдэҕэ сэттэ мэтээл баар буоллаҕына, чэппиэргэ өссө биир эбилиннэ. Ол курдук, 38 киилэҕэ диэри ыйааһыннаахтарга тустар Любомир Ашеин чемпионнаан дойдулаахтарын үөртэ.
Икки күннээх күрэхтэһии түмүгүнэн, Саха сирин эдэр бөҕөстөрө көҥүл тустууга 15 мэтээллэннилэр: үс – кыһыл, түөрт – үрүҥ, аҕыс – боруонса.
38 кг диэри ыйааһыннаахтарга Саха сирин икки тустууга — Егор Вензель уонна Любомир Ашеин күөн көрсүбүттэрэ. Егор 0:2 счекка хотон иһэн, кэнники сөкүүндэни мүччү тутан, хапсыһыы 4:2 ахсаанынан түмүктэннэ. Онон Егор иккис миэстэҕэ таҕыста. Манна даҕатан эттэххэ, кини убайа Афанасий Вензель «Азия оҕолорун» V Оонньууларыгар бу ыйааһыҥҥа үрүҥ көмүһү ылан турар.
«Онус кылааска үөрэнэбин. Тустуунан иккис кылаастан дьарыктаммытым. Маннык күрэхтэһии туһата улахан. Бу Оонньууларга кыттан бириистээх миэстэни ылбыт оҕолору билэттиибин. Биһиги манна кыттаарыбыт турунан дьарыктаммыппыт, онон үчүгэй бэлэмнээхпит дии саныыбын. Бу кыайыыбын тренердэрбэр уонна чугас дьоммор аныыбын», — диир Ашеин.
Үрүҥ көмүс мэтээли Егор Вензель (38 кг диэри ыйааһыннаахтарга), Албан Аввакумов (63 кг диэри), Нерда Данилова (37 кг диэри) ылар чиэскэ тигистилэр. Онтон боруонсанан Артем Аммосов (63 кг диэри), Иван Алексеев (85 кг диэри), Аэлита Яковлева (44 кг диэри) уонна Антонина Николаева (57 кг диэри) наҕараадаланнылар.
Турнирга Казахстан бэрэстэбиитэлэ Даулет Тамиржанов диэн саҥа аат күөрэйдэ. Кини икки утарылаһааччытын холкутук баһыйда. Түмүккэ Уһук Илин хамаандатын бөҕөһүн Александр Гришкины 10:0 ахсаанынан эрэллээхтик хотто.
«Биир күн иһигэр үстэ туһуннум. Бастаан вьетнамеһы, онтон Таджикистан спортсменын кытта. Саамай ыарахан киирсиим Россия бөҕөһүнүүн буолла. Хата, онно тута хас да баалы ылбытым көмөлөстө. Бу «Азия оҕолоро» спортивнай Оонньуу элбэх спортсмеҥҥа бигэ тирэх буолар. Онон мин эмиэ мантан куорсун анньынан, баҕар, хаһан эмэ Олимпиадаҕа кыттар чиэскэ тиксиэм», — диэн Даулет Тамиржанов санаатын үллэһиннэ.
Уолаттарга кыайыылаахтар уонна призердар:
38 кг диэри ыйааһыннаахтарга:
1 м. — Любомир Ашеин (Саха сирэ); 2 м. — Егор Вензель (Саха сирэ); 3 м. — Улуу Тайырбек Жхумарбек (Кыргызстан); 3 м. — Ернар Кесенбек (Казахстан);
50 кг диэри ыйааһыннаахтарга:
1 м. — Даулет Темиржанов (Казахстан); 2 м. — Александр Гришин (УИФУо); 3 м. — Авзалщохи Хикматулло (Таджикистан); 3 м. — Алдар Мункуев (СФУо);
63 кг диэри ыйааһыннаахтарга:
1 м. — Вахид Ализаде (Азербайджан); 2 м. — Албан Аввакумов (Саха сирэ); 3 м. — Артем Аммосов (Саха сирэ); 3 м. — Мейрамбек Сулейманов (Казахстан);
85 кг диэри ыйааһыннаахтарга:
1 м. — Зиямухаммет Сапаров (Туркменистан); 2 м. — Ламберт Харонов (СФУо);
3 м. — Иван Алексеев (Саха сирэ); 3 м. — Абылай Совет (Казахстан).
Кыргыттарга кыайыылаахтар уонна призердар:
37 кг диэри ыйааһыннаахтарга:
1 м. — Луг Ли Гианг (Вьетнам); 2 м. — Нерда Данилова (Саха сирэ); 3 м. — Ояндари Ганбат (Монголия);
44 кг диэри ыйааһыннаахтарга:
1 м. — Эрденесуд Бат-Ердене (Монголия); 2 м. — Нилуфар Раимова (Казахстан);
3 м. — Аэлита Яковлева (Саха сирэ); 3 м. — Алия Нуриязданова (Красноярскай);
57 кг диэри ыйааһыннаахтарга:
1 м. — Екатерина Фирстова (Казахстан); 2 м. — Анудари Нандинтсетсег (Монголия); 3 м. — Антонина Николаева (Саха сирэ); 3 м. — Екатерина Ван (УИ ФУо);
