Бэс ыйын 4 күнүгэр Орто Халыма улууһа «Азия оҕолоро» оонньуулар Уотун эстафетатын тутта.
Бэлиэ уоту биир дойдулаахпыт, Баһылай Манчаары аатынан өрөспүүбүлүкэтээҕи физкультурнай-чэбдигирдэр киин салаатын начаалынньыга, СӨ эдэр ыччат политикатын туйгуна, СӨ култууратын уонна спордун туйгуна Сергей Бандеров аҕалла.
Улуус киэн туттар спортсмена Уоту Орто Халыма сиригэр тиксэрээт, куорат орто оскуолатын 5-с «в» кылааһын үөрэнээччитигэр Лёня Мухановка туттарда. Салгыы оонньуулар Уоттарын улууспут 11 чулуу спортсмена күөрэччи тутан куорат киинигэр киллэрдилэр.
Уоту көрсүү сиэрэ-туома Орто Халыма куорат оскуолатын тиэргэнигэр ыытылынна. Манна куорат олохтоохторо: кыратыттан аарыма кырдьаҕаһыгар тиийэ кэллилэр. Дьааҥы Киһилээх Таастарыттан саҕыллыбыт Уоту сахалыы алгыс тылынан Александра Антипина айхаллаата.
Үөрүүлээх түгэн „Азия оҕолоро“ оонньуулар өрөгөй ырыатынан доҕуһуолланан түмүктэннэ.
This post was published on 04.06.2016 14:38 14:38