«Азия оҕолоро»: Саха сирин сүүмэрдэммит хамаандатыгар тустууктар сэттэ мэтээли эптилэр

«Азия оҕолоро» Оонньууларга көҥүл тустууга күрэхтэһиигэ бастакы күн түмүгүнэн – икки чемпион, биир үрүҥ көмүс, түөрт боруонса баар буолла.

Аан бастакынан «кыһыл көмүс» мэтээли чурапчы тустууга Дмитрий Илларионов (35 кг диэри ыйааһыҥҥа) ылла. Түмүк киирсиигэ кини Таджикистан сүүмэрдэммит хамаандатын тустуугун Шохруз Саидовы 10:0 кыайда.

«Урут өрөспүүбүлүкэҕэ чемпионнаабытым, Россияҕа бастаабытым. Билигин бу Оонньууларга кыайыбыппыттан үөрэбин. Түмүк киирсиибит ыарахан буолара буолуо диэн дьулайбытым, хата, этэҥҥэ буолла. Саамай күүстээх утарылаһааччым, дойдулааҕым Дмитрий Григорьев. Бу иннинэ кинилиин көбүөргэ көрсөн бэрт нэһиилэ кыайбытым», — диир Дмитрий Илларионов. Кини кэпсиир доҕоро Дмитрий Григорьев бу ыйааһыҥҥа үһүс бириистээх миэстэни былдьаһыыга Казахстан уолун Тамир Муратбаевы 12:4 хотон, «боруонсаны» ылла.

Иккис «көмүс» хаһаайынынан Айсен Никифоров (Бүлүүгэ тустууктар оскуолаларын иитиллээччитэ. 46 кг диэри) буолла. Сытыы хапсыһыыга кини бэйэтин саастыылааҕын Жассулан Ораһы (Казахстан) 5:3 кыайда.

«Мин Жассулан Оразка сүүмэрдээһиҥҥэ кыайтарбытым. Оттон манна тренерим сүбэтинэн, ыалдьааччыларым көмөлөрүнэн кыайдым дии саныыбын. Аны Россияҕа бастыыр иһин күрэхтэһиигэ бэлэмнэнэбин», — диэн Айсен санаатын үллэһиннэ.

«Үрүҥ көмүс» мэтээл Саха сирин хамаандатын спортсменыгар Никита Софроновка (58 кг диэри ыйааһыҥҥа) тигистэ. Никита түмүк киирсиигэ Азербайджан күүстээх бөҕөһүгэр Туран Байрамовка сабырыйтарда.

Пьедестал үһүс үктэлигэр Дмитрий Григорьев (35 кг диэри), Максим Лубенецкай (76 кг диэри), Саина Малышева (32 кг диэри) уонна Наталья Агеева (52 кг диэри) туран дьоннорун-сэргэлэрин үөртүлэр.

Көҥүл тустууга уолаттарга «Азия оҕолоро» Оонньуулар чемпионнара уонна призердара:

35 кг диэри ыйааһыннаахтарга (8 кыттааччы):

1 м. — Дмитрий Илларионов (Саха сирэ); 2 м. — Шохруз Саидов (Таджикистан); 3 м. — Дмитрий Григорьев (Саха сирэ); 3 м. — Эрдем Борокшанов (Сибиирдээҕи ФУо);

46 кг диэри ыйааыннаахтарга (8 кыттааччы):

1 м. — Айсен Никифоров (Саха сирэ); 2 м. — Жасулан Ораз (Казахстан); 3 м. —  Наранху Мармадах (Монголия); 3 м. — Чаяан Мангуш (Сибиирдээҕи Ф Уо);

58 кг диэри ыйааһыннаахтарга (10 кыттааччы):

1 м. — Туран Байрамов (Азербайджан); 2 м. — Никита Софронов (Саха сирэ); 3 м. — Бибарис Ассилбек (Казахстан); 3 м. — Биямбадори Энхбай (Монголия);

76 кг диэри ыйааһыннаахтарга (7 кыттааччы):

1 м. — Бекзат Уркимбай (Казахстан); 2 м. — Семен Манелюк (УИ ФУо); 3 м. — Максим Лубянецкай (Саха сирэ); 3 м. — Виталий Стребков (Сибиирдээҕи Ф Уо).

Көҥүл тустууга кыргыттарга «Азия оҕолоро» Оонньуулар чемпионнара уонна призердара:

32 кг диэри ыйааһыннаахтарга (5 кыттааччы):

1 м. — Лучана Бекбаулова (Сибиирдээҕи ФУо); 2 м. — Марал Тангирбергенова (Казахстан); 3 м. — Саина Малышева (Саха сирэ);

40 кг диэри ыйааһыннаахтарга (8 кыттааччы):

1 м. — Дарья Мануил (Сибиирдээҕи ФУо); 2 м. — Тсиням Туменбаяр (Монголия); 3 м. — Фуонг Нгуен (Вьетнам); 3 м. — Аяажан Мархашева (Казахстан).

52 кг диэри ыйааһыннаахтарга (6 кыттааччы):

1 м. — Хонгорзул Болдсайхан (Монголия); 2 м. — Дарна Абен (Казахстан); 3 м. — Шоира Раджабова (Красноярск); 3 м. — Наталья Агеева (Саха сирэ).