80-тан тахса култуура тэрээһинигэр «Азия оҕолоро» оонньуулар кыттыылаахтара сылдьыахтарын сөп. Дьокуускай куорат бөдөҥ уопсастыбаннай сирдэрэ бары ураты умнуллубат дьиҥ саха норуотун историятын кэпсиир дьаһаллары ыытыахтара. Ол туһунан регион салалтатын пресс-сулууспата иһитинэрэр.
«Азия оҕолоро» оонньуулар Саха сиригэр бэс ыйын 26 — от ыйын 7 күннэригэр ыытыллаллар. Манна спортивнай күрэхтэһиилэр эрэ буолбакка, култуура бырагыраамата эмиэ киэҥник барыаҕа.
Россия президенэ Владимир Путин бэс ыйын 18 күнүгэр Дьокуускайга кэлэ сылдьан саха норуотун талаанын туһунан чуолкайдаан бэлиэтээбитэ. Национальнай култуураҕа харыстабыллаах сыһыан, айар талааннары иитэн таһаарыы туспа тосхол быһыытынан ыытылларыгар, ыччаты сайыннарыыга күүскэ үлэлииллэригэр махтаммыта.
«Күн аайы 11 чаастан киэһэ хойукка диэри куорат болуоссаттарыгар биллэр артыыстар, музыкальнай бөлөхтөр, айар кэлэктииптэр кыттыылаах кэнсиэртэр буолуохтара. Бэстибээллэр уонна быыстапкалар тохтоло суох тэриллиэхтэрэ. Культурнай бырагыраама оҕоҕо да, улахан да киһиэхэ интэриэһинэй буоларыгар тэрийээччилэр кыһалыннылар», — диэтэ култуура миниистирэ Афанасий Ноев.
Сиһилии https://ysia.ru/uchastnikov-i-gostej-igr-deti-azii-poznakomyat-s-samobytnoj-kulturoj-yakutii/
This post was published on 26.06.2024 10:01 10:01