Шахмаччыттар күөн көрсүһүүлэрин аһыллыытыгар норуоттар икки ардыларынааҕы шахмаччыттар федерацияларын салайар Кирсан Илюмжинов уонна СӨ бастакы бэрэсидьиэнэ, билигин Госдума депутата Михаил Николаев кытыннылар.
«Шахмат тулуурдаах, дьаныардаах буолары ирдиир. «Азия оҕолоругар» кыттааччыларга барыгытыгар ситиһиилэри баҕарабын. Бу Оонньуулар оҕо кыаҕын арыйарыгар, спортивнай карьератын саҕалыырыгар бэртээхэй далаһа уураллар», — диэтэ Кирсан Илюмжинов.
Күрэхтэһиигэ 27 уол, 26 кыыс 12 араас дойдуттан кытталлар. Саха сирин сүүмэрдэммит хамаандата 8 шахмаччыттаах.
«ФИДЕ биэс маастара турнирга кыттар. Олор истэригэр биһиги уолбут Айсен Анисимов баар. Биһиги киниэхэ эрэлбит улахан. Аны туран, Вьетнам, Монголия, Азербайджан уонна Россия күүстээх оонньооччулардаах. Онон долгуйуу баара ханна барыай», — диир Саха сирин шахмакка федерациятын толорооччу дириэктэрэ Владимир Таппыров.
Күрэхтэһии тоҕус этаптаах. Түмүктүүр күрэхтэһии от ыйын 13 күнүгэр ХИФУ 10 чаастан саҕаланар.
This post was published on 07.07.2016 16:57 16:57