«Азия оҕолоро» VI-с Оонньуу үһүс күнүгэр мэтээл 34 кэмпилиэгэ оонньонно. Күрэхтэһии спорт 11 көрүҥэр буола турар. Манна кыттар спортсмен ахсаана — 1026. Ити туһунан кылаабынай судьуйа Семен Чердонов эттэ.
Судьуйалар, тренердар бары мандаат хамыыһыйатын аастылар, спорт эбийиэктэрэ режиминэн үлэлии тураллар. Урукку Оонньууга мэтээл ахсаанынан Саха сирэ уонна Монголия инники кирбиигэ испит эбит буоллахтарына, бириистээх миэстэлэри Вьетнам, Йемен, Туркменистан, Шри-Ланка, Таджикистан ылан иһэллэр. 17 судаарыстыба уонна Россия регионнара мэтээллэри ыллылар», — диир Семен Чердонов.
Мэтээл ахсаанынан Казахстан спортсменнара 6 көмүс, 7 үрүҥ көмүс, 8 боруонса мэтээллээхтэр. Оттон Саха сирэ — 5 кыһыл көмүс, 6 үрүҥ көмүс, 7 боруонса. Сибиирдээҕи федеральнай уокурук – 7 кыһыл көмүс, 2 үрүҥ көмүс, 7 боруонса мэтээллэрдээх.
«Күрэхтэһиилэргэ норуоттар икки ардыларынааҕы кылаастаах спорт үс маастара баар: биир харбааһыҥҥа, икки – художественнай гимнастикаҕа. Бу биллэн турар, кытааччылар таһымнара үрдээбитин көрдөрөр», — диэн Оонньуу кылаабынай сэкэритээрэ Семен Говоров эттэ.
