«Азия оҕолоро» VIII норуоттар ардыларынааҕы спортивнай оонньууларга көҥүл тустууга Саха сирин састаабыгар 11 кыыс кыттыаҕа. 2009–2011 сылларга төрүөх кыргыттар Дьокуускайтан, Нерюнгриттан, Уус Алдантан, Эдьигээнтэн, Томпоттон, Сунтаартан уонна Намтан киирдилэр. Ол туһунан регион салалтатын пресс-сулууспата суруйда.
«Кыргыттар эрдэ Уһук Илин уокурукка 16 диэри саастаахтарга ситиһиилээхтик кыттыбыттара. Бу сыл тохсунньутугар Хабаровскайга буолбута күрэхтэһиигэ. Онно кинилэр икки кыһыл, үс үрүҥ көмүс, үс боруонса мэтээллэри ылбыттара, икки кыыс бэһис миэстэ буолбуттара. «Азия оҕолоругар» биэс мэтээли ылар былааннаахпыт, кыһыл, үрүҥ көмүстэри уонна боруонсаны», — диэтэ кыргыттарга көҥүл тустууга старшай тренер Анджелика Парникова.
Хамаанда бэлэмнэниини Бишкеккэ, Улан-Удэҕэ уонна Москваҕа ааспыта, маны сэргэ икки улууска. Түмүктүүр түһүмэҕи Дьокуускайга Р.М. Дмитириев аатынан олимпийскай саппаас училищетыгар ыытыахтара.
This post was published on 04.06.2024 16:01 16:01