Дьокуускайга Хомсомуол болуоссатыгар «Азия оҕолоро» оонньуларын 3х3 баскебола саҕаланна. Уолаттарга тоҕус хамаанда кыттар, кыргыттарга — сэттэ.
Оонньуулар судьуйалара Армен Оганисян эппитинэн, 3×3 баскетбол үгэскэ кубулуйбут баскетболга майгынныыр, ити эрээри киэҥ былаһааккаҕа оонньонор. Үстүү киһилээх хамаанда былаһаакка аҥарыгар оонньууллар, мээчигинэн атаакалаан уонна көмүскэнэн. 10 мүнүүтэ иһигэр ким бастакынан 21 очукуону ылбыт, ол кыайыылаах буолар.
«Бүгүн кыргыттар кииристилэр. Саха сирин, Беларусь, Казахстан, Узбекистан, Уһук Илин, Урал уонна Сибиир хамаандалара оонньууллар. Кыргыттар хамаандалара быйыл үчүгэй бэлэмнээхтэрин көрдөрөллөр, турнир иннинэ элбэх үлэни ыыппыттар. Эбиэт кэннэ былаһааккаҕа уолаттар таҕыстылар — Саха сирэ, Беларусь, Казахстан, Кыргызстан, Узбекистан, Таиланд, Россия федеральнайдааҕы уокуруктара», — диэтэ Армен Оганисян.
Бастакы күн Саха сирин кыргыттарын хамаандата икки хамаанданы кыайда — Сибиирдээҕи федеральнай уокуругу 11:10, Узбекистаны 11:8 ахсаанынан. Кыргыттар хамаандаларын старшай тренера Константин Александров эппитинэн, өрөспүүбүлүкэ хамаандатыгар түөрт кыыс 2008-2009 сыллардааҕы төрүөхтэр бааллар.
Эрчиллии сылы быһа ааспыт. Араас турнирдарга кыттыбыттар, күрэхтэһиилэргэ киирсибиттэр, үөрэтэр- тренировкаланар түмсүүлэргэ Москваҕа сылдьыбыттар.
Матчтар күн аайы 10 чаастан от ыйын 2 күнүгэр диэри ыытыллаллар.
This post was published on 27.06.2024 14:02 14:02