Атырдьах ыйын 17 күнэ. Арассыыйаҕа дефолт биллэриллибит - Бикипиэдьийэ

Габон — Тутулуга суох буолуу күнэ (Францияттан, 1960)
Боливия — Дуоҕа күнэ
Индонезия — Тутулуга суох буолуу күнэ (Японияттан, 1945)
Арассыыйа — Арассыыйаҕа салгын флотун күнэ
Колумбия — Инженер күнэ
Словения — Прекмурье словеннара ийэ омугу кытта хат холбоспут күннэрэ
Ямайка — Маркус Гарви күнэ. 2012 сыллаахтан Ямайкаттан төрүттээх панафриканист, хара националист Маркус Гарви төрөөбүт күнүгэр (1887-1940) бэлиэтэнэр
Арассыыйа — Салабаар күнэ

Түбэлтэлэр:

1502 — Христофор Колумб Гондурас сирин Испания бас билиитинэн биллэрбит.
1771 — Англия учуонайа Джозеф Пристли фотосинтез көстүүтүн арыйбыт. Умайыы эбэтэр тыыныы түмүгэр буомурбут салгын күөх үүнээйи дьайыытынан төттөрү тыынарга табыгастаах буоларын бэлиэтии көрбүт.
1903 — Джозеф Пулитцер суруналыыстарга Пулитцер бириэмийэтин олохтообут.
1908 — «Фантасмагория» диэн бастакы мультфильм Парижка көрдөрүллүбүт.
1913 — Онтарио штатын (Канаада) үөрэхтээһин департаамена француз тылынан үөрэтиини боппут.
1918 — Бассабыыктар баһылыктарыттан биирдэстэрэ Моисей Урицкайы өлөрбүттэр.
1934 — ССРС суруйааччыларын Бүтүн сойуустааҕы бастакы сийиэстэрэ буолбут. Былатыан Ойуунускай бырабылыанньа чилиэнинэн талыллыбыт.
1945 — Аан дойду иккис сэриитэ бүтүүтүгэр Индонезия тутулуга суоҕун биллэрбит. Бу дойдуну үйэ кэриҥэ баһылаан олорбут Нидерланды ону билиммэтэх, инньэ гынан 4 сыллаах босхолонуу сэриитэ саҕаламмыт.
1955 сыллаахха саха буруйа суох репрессияламмыт элбэх дьонун ааттарын сырдыкка таһаарбыт учуонай Ираида Клиорина толору реабилитацияламмыт. Кини бэйэтэ уонтан тахса сыл лааҕырга, ол кэнниттэн көскө олорбута.
1977 — «Арктика» сэбиэскэй атомнай ледокол Хотугу полюска тиийбит.
1998 — Сергей Кириенко салайар РФ бырабыыталыстыбата дефолт (ол аата иэһин кэмигэр төлүүр кыаҕа суоҕун туһунан) биллэрбит уонна солкуобай куурсун өйүүр бэлиитикэтин тохтоппут. Арассыыйа саамай дириҥ кириисистэриттэн биирдэстэрэ саҕаламмыт. Бу төрүөтүнэн аһара улахан бүддьүөт ороскуота (Госдума сарбыйартан аккаастаммытын түмүгэр) уонна аан дойдуга ньиэп сыаната түһүүтэ, Азияҕа 1997 сыллааҕы кириисис буолбуттар.
1999 — Туурсуйаҕа Измит диэн сиргэ сир хамсааһына буолбут, 17 тыһыынча киһи өлбүт.
2009 — Хакасияҕа Саян-Шушенскай быһыкка саахал буолбут, 75 киһи өлбүт.

Төрөөбүттэр:

1938 — Иван Негенбля, Саха Өрөспүүбүлүкэтин култууратын үтүөлээх диэйэтэлэ, устуоруйа билимин хандьыдаата, публицист.
1942 — Муслим Магомаев (2008 өлб.), ССРС, Азербайджан уонна Арассыыйа ырыаһыта, ССРС норуодунай артыыһа.

Өлбүттэр:

1972 — Байкаалга тыыта түҥнэстэн Александр Вампилов (1937 төр.), драматург. Аҕатын — бүрээт учууталын — панмонголизмҥа буруйдаан 1938 сыллаахха суутунан ытан өлөрбүттэрэ.