18 От ыйа 18.07
  • 18°
  • $ 88,09
  • 96,3

«Арыгыта суох Арктика» ыалдьыттара – Намҥа

Читайте нас на
Яндекс Новости
ЯДВ

«Арыгыта суох Арктика» конгресс чэрчитинэн Арассыыйаттан кэлбит экспертэр Нам улууһугар нэһилиэнньэни кытары көрүстүлэр.


Чөл олох туһунан 102 кинигэ ааптара, п.н.д, профессор, чөл олох аан дойдутааҕы академиятын президенэ Александр Маюров уонна чөл олох академиятын вице-президенэ, м.н.д., профессор Анатолий Карпов улуус олохтооругар семинар ыыттылар.

Кинилэри арыаллаабыт СӨ Госалкогольконтроль управлениетын салайааччыта Матвей Лыткин эппитинэн, Александр Маюров Саха сиригэр 48-с сырыыта, ол иһигэр, Нам улууһугар үсүһүн кэллэ.

– Нам улууһугар эрэ арыгынан эргинэр маҕаһыыннар социальнай суолталаах тэрилтэлэртэн 800 миэтирэ тэйиччи тураллар. Оттон атын куораттарга депутаттар төһө миэтэрэни олохтуохтаахтарын (20 м эбэтэр 50 м) күн бүгүҥҥэ диэри мөккүһэллэр, – диэн Александр Маюров эттэ.

-Манна даҕатан эттэххэ, депутаттар Намнааҕы сэбиэттэрэ улуус киинигэр Намҥа арыгылаах бородууксуйаны атыылааһыны бобор туһунан сокуону көҕүлээбиттэрэ. Ону СӨ Судаарыстыбаннай Мунньаҕын (Ил Түмэн) депутаттара күһүҥҥү сессияҕа көрүөхтээхтэр.

Ыалдьыттар баһылык э.т. Марина Обутовалыын уонна уопсастыбаннаһы кытары көрүстүлэр. Онтон арыгы атыыланар маҕаһыына суох Модут с. сырыттылар. Олохтоохтор этэллэринэн, кистээн атыылыыр «туочукалар» бааллара биллэн ааһар. Ол да буоллар, нэһилиэнньэ бэрээдэги олохтуур былааннаах.

Александр Маюров табахтан аккаастаныы судургу ньымаларын, Анатолий Карпов арыгы уйулҕа ханнык кэһиллиилэригэр тиэрдэрин туһунан кэпсээтилэр.

Лектордар эбиэт кэнниттэн Нам с. 1 уонна 2 нүөмэрдээх оскуолаларын учууталларын уонна төрөппүттэрин, Намнааҕы педагогическай колледж устудьуоннарын кытары атах тэпсэн олорон кэпсэттилэр.

Анатолий Михайлович төрөппүттэр уонна учууталлар оҕолор телевизорга, Интернеккэ тугу көрөллөрүгэр улахан болҕомтолорун ууралларыгар ыҥырда. Онтон устудьуоннары кытары эдэр киһи доруобуйатын кыра сааһыттан харыстыахтааҕын туһунан кэпсэттилэр. Кыргыттар доруобай оҕону төрөтүөхтэрин баҕарар буоллахтарына, арыгыны олох иһиэ суохтаахтарын санаттылар.

Семинары ыытааччылар уонна олохтоохтор Нам улууһа сотору арыгыттан олох аккаастанар бастакы улууһунан буолуоҕар эрэнэ хааллылар.

Следите за самым важным и интересным в Telegram-канале и WhatsApp-группе ЯСИА