19 От ыйа 19.07
  • 21°
  • $ 87,88
  • 96,1

Арыгы атыыламмат Тааһаҕарыгар туризмы сайыннарар баҕалаахтар

09:42, 25 марта 2016
Текст:
Читайте нас на
Яндекс Новости
ЯДВ

Бүлүү улууһун Тааһаҕар нэһилиэгэ 2005 сылтан чөл олох тирэх киининэн буолбута. Ити кэмтэн ыла 600 киһилээх нэһилиэк маҕаһыыннарыгар арыгы уонна арыгылаах бородууксуйа атыыламмат. Ол оннугар туризмы сайыннарар баҕалаахтар.


Нэһилиэк баһылыга Семен Каратаев арыгылааһыны утары бэлиитикэ форумугар кэлэ сылдьан кэпсээбитинэн, арыгы атыыламмат буолуоҕуттан ыла нэһилиэккэ үлэтэ суох киһи ахсаана аҕыйаабыт, дьон өйө-санаата тосту уларыйбыт.

«Өссө биир ситиһиибитинэн Бүлүү бөлөх улууһугар табаны иитэр соҕотох база биһиэхэ арыллыбыта буолар. 2007 с. «Таба» национальнай хампаанньа генеральнай дириэктэрэ Алексей Мандаров кэлэ сылдьан, табаны иитиэххэ сөптөөх бэртээхэй сир баарын көрбүт. Хоту дойдуттан кэлбит, тааһаҕардар күтүөттэрэ Леонид Потаповы көрсөн ирэ-хоро кэпсэппиттэр уонна үлэни саҕалыырга сүбэлэспиттэрэ», — диир кини.

2009 с. 40-ча табаны, 2013 с. сүүс табаны аҕалбыттар. Онон билигин «Таба» хампаанньа Тааһаҕарга сиппит-хоппут базалаах, 190-ча табалаах. Таба базатыгар 3 хамнастаах үлэһит көрүллэр. Судаарыстыбаннай бырагыраамаҕа киирсэннэр, 3,5 мөл. солк. суумалаах көмөнү ылбыттар. Онон материальнай базаларын тупсаран, үлэһиттэргэ олорор дьиэ, устудьуоннар дьарыктанар лабораторияларын, баанньык, гараас туппуттар. Күн батареятынан хааччыллан олороллор. Табалар турар базалара бэл муостата кырааскалааҕын үгүс киһи соһуйа, сэргии көрөр. Ыстаада биригэдьииринэн урут хаһан да табаны харахтаан да көрбөтөх Владислав Поскачин диэн эдэр уол үлэлиир. Уолаттар ис сүрэхтэриттэн кыһаналлар, эппиэтинэстээхтик сыһыаннаһаллар. Лабораторияҕа Саха сиринээҕи тыа хаһаайыстыбатын судаарыстыбаннай академиятын устудьуоннара кэлэн үөрэнэллэр, табаны көрүү-истии ымпыгын-чымпыгын билсэллэр.

«Биһиги инникитин манна туризмы көҕүлүүр баҕалаахпыт. Нэһилиэктэн 25 км сиргэ сытар мэччирэҥ сирэ-уота үчүгэйэ, тыытыллыбатах айылҕалааҕа барыта сөп түбэһэр. Киинтэн кэлбит ыалдьыттар сүүсчэкэ таба хаамса сылдьарын көрөн соһуйаллар даҕаны, астыналлар даҕаны. Ол гынан баран, дьон сылдьыаҕын суола-ииһэ мөлтөҕө мэһэйдиир. Суолу ыраастаабыт да иһин, күн аайы тибэ турар. Дэриэбинэттэн чугас, үчүгэй суоллаах-иистээх сиргэ база туппут киһи диэн баҕалаахпыт. Саас-күһүн Халыматтан баран саҥа табалары аҕала турабыт», – диэн баһылык Каратаев кэпсиир.

Следите за самым важным и интересным в Telegram-канале и WhatsApp-группе ЯСИА