Саха сирин кинематографистарын «Его дочь» киинэлэрэ Выборг куоракка ыытыллбыт «Окно в Европу» фестиваль муҥутуур кыайыылааҕынан буолла. Сценарийы суруйбут Татьяна Эверстова үлэтэ үрдүктүк сыаналанна.
«Его дочь» киинэни сахалар французтары кытта устубуттар. «Дириҥ ис хоһоонноох, намчы, ол эрээри күүстээх киинэ. Чараас, дьикти, киһини сырдатар, ытатар киинэ. Киинэ өссө да элбэх биһирэбили инникитин да ылыа турдаҕа», — диэн жюри чилиэнэ Арсений Гончуков Фейсбукка баар страницатыгар суруйар.
«Бэйэ санаатын-оноотун киинэнэн бу курдук тиэрдии – улахан ситиһии. Үлэтин саҥа саҕалаан эрэр ааптар – чаҕылхай талаан», — диир кини.
«Его дочь» киинэҕэ Саха сирин түгэх дэриэбинэтигэр эһээтин, эбээтин кытта олорор кыыс туһунан кэпсэнэр. Киинэни биллиилээх режиссер Сергей Урсуляк баһылыктаах жюри улаханнык биһирээтэ. Киинэ сценарийын суруйбут Татьяна Эверстова фестиваль анал бирииһин ылла.
This post was published on 15.08.2016 13:57 13:57