Урбаанньыт Арсен Томскай көҕүлээһининэн «Синет Спарк» тэрилтэ Хаҥалас улууһугар бастакынан ойуур баһаардарын кытары охсуһууга анал тэрил, тиэхиникэ ылан көмөлөстө. Бу туһунан СИА Хаҥалас улууһун пресс-сулууспатыгар сигэнэн суруйар.
Уопсайа 875 780 тыһ суумалаах көмө оҥоһулунна. 2 квадрокоптер, баһаарынай рукав арааһа, 3 «СВ 50» клаапаннаах сиэккэ, 20 «Ермак РП 18» ранец, «Иридиум 9555» диэн икки спутниковай төлөпүөн, онно 250 мүнүүтэлээх 2 сим-карта, биир бэнсиининэн барар генератор, 4 баһаарынай мотопомпа, 20 респиратор-полумаска, 20 кааска, 15 ыстыык лаппаакы, 5 баһымньы сүгэ о.д.а. наадалаах тэриллэр ылылыннылар. Балары улуус салалтата ойуурдара умайар нэһилиэктэринэн көрөн түҥэтиэҕэ.
«Синет Спарк» улууска иккис көмөлөһөөһүнэ. Былырыын коронавирус тарҕаныыта тэрилтэ Хаҥалас киин балыыһатыгар 4,5 мөл. солкуобайы тыҥа искусственнай вентиляциятын аппарааттарын ыларга көмөлөспүтэ.
This post was published on 13.07.2021 18:03 18:03