Арктикатааҕы судаарыстыбаннай култуура, искусство уонна айар индустрия университета (АГУИККИ) 2026 сылга эбии уонтан тахса саҥа үөрэх хайысхатын киллэрэр былааннаах. Бу туһунан ТАСС-ка үрдүк үөрэх кыһатын ректора Саргылана Игнатьева иһитиннэрдэ.
Игнатьева этэринэн, 2026 сылга үөрэнэ киирээччилэргэ бакалавриат, специалитет, магистратура бырагырааматыгар 13 саҥа хайысха эбии баар буолуоҕа. Бу билигин баар 49 хайысханы өссө кэҥэтиэҕэ. Санатар эбит буоллахха, 2025 сылга саҥа идэлэринэн продюсердааһын, үҥкүүнү туруоруу, ырыаны үөрэтии, Арктика кииннэрин чинчийии уонна Арктика айар индустриялара арыллыбыттара.
Бакалавриат саҥа хайысхаларынан буолуохтара: «Медиакоммуникациялар», «Арт-проектирование» уонна «Эрэгийиэннээҕи киинэ оҥоруута». «Дизайн» хайысхатыгар улахан болҕомто ууруллуоҕа, онно «Ойуулук», «Дьиэ интерьерын, эйгэтин оҥорор цифровой хайысха» уонна «Оонньуу ис-тас көрүҥүн айан таһаарыы” үөрэхтэрэ киириэхтэрэ. Специалитетка «Графика» диэн эрэгийиэн уратытын көрдөрөр ойуулук-худуоһунньуктары бэлэмниир хайысха арыллыаҕа. Магистратура «Искусственнай интеллект уонна цифровой нэһилиэстибэ», «Арктика култууратын үйэлээх баайа уонна уус-уран айар үлэтэ», ону таһынан «Судаарыстыбаннай култуурнай бэлиитикэ эйгэтин менеджменэ» диэн хайысхаларынан кэҥиэҕэ.
Саҥа идэлэр эбиллиилэрэ үөрэх кыһатын статуһа уларыйбытын кытта сибээстээх, 2025 сыл бүтүүтэ Арктикатааҕы судаарыстыбаннай култуура уонна искусство института университет аатын сүгэн АГУИККИ диэн ааттаммыта.
25 сыл иһигэр университет култуура, искусство уонна айар индустрия эйгэтигэр 3500-тэн тахса идэлээх исписэлииһи бэлэмнээн таһаарда. Билигин манна 1150 устудьуон үөрэнэр, суруйда ЯСИА саайта.
Тылбаастаата Алина Диодорова.
This post was published on 23.01.2026 11:01 11:01