Россия Арктикатын сайыннарыы социальнай-экэнэмиичэскэй бырагырааматын муус устар 20 күнүгэр диэри дойду бырабыыталыстыбатын көрүүтүгэр киллэриллиэҕэ. Бу туһунан ТАСС тириэрдэр.
«2025 сылга диэри Арктика социальнай-экэнэмиичэскэй сайдыытын бырагыраамата билигин оҥоһулла сылдьар, муус устар 20 күнүгэр диэри бырабыыталыстыба көрүүтүгэр киллэриллиэҕэ», — диэн Федерация Сэбиэтигэр Саха сирин сенатора Александр Акимов иһитиннэрдэ.
Бырагыраамаҕа социальнай эбийиэктэр, оҕо уһуйаннара уонна оскуолалар тутуллууларын, сибээс уонна телекоммуникация сайдыытын, хотугу төрүт норуоттар таба иитиитин уонна балыктааһын курдук үгэс буолбут дьарыктара сайдар усулуобуйаларын олохтооһун боппуруостара киирэллэрэ этиллэр.
Россия Арктикатын балаһатыгар Саха сирин 13 улууһа киирэр: Абый, Аллайыаха, Анаабыр, Булуҥ, Үөһээ Халыма, Дьааҥы, Аллараа Халыма, Эдьигээн, Муома, Өлөөн, Орто Халыма, Усуйаана уонна Эбээн Бытантай.
This post was published on 07.02.2020 14:31 14:31