2025 сылга Саха сиригэр социальнай суолталаах табаары Арктика оройуоннарыгар тиэрдии уопсай кээмэйэ 6 тыһыынча тоннаҕа тэҥнэстэ: 4,5 тыһыынча тонна кыһыҥҥы суолунан тиэрдилиннэ уонна өссө 1,5 тыһыынча тонна навигациянан. Бу туһунан Арктика сайдыытыгар уонна Саха сирин Хотугу норуоттарын дьыалаларыгар миниистир Владимир Черноградскай иһитиннэрдэ.
Кини бигэ логистическай ситими үөскэтиигэ кэнсиэрбэ сыаҕын үлэҕэ киллэрии дьоһун дьаһалынан буолбутун бэлиэтээтэ.
«Быйыл Арктика 13 оройуонугар эргиэн-логистическай киини тутуу бырагырааматын олоххо киллэриини түмүктүүбүт. Саҥа кэнсиэрбэ сыаҕа — бу хотугу сирдэр олохтоохторун куттала суох аһынан-үөлүнэн хааччыйыыга туһуламмыт үлэ салгыыта буолар», — диэтэ Владимир Черноградскай.
Саҥа производственнай эбийиэк аныгы ас-үөл кэмбинээтэ буолар, онно хас да көрүҥнээх кэнсиэрбэ бородууксуйаны таһаарыы тэриллиэҕэ. Производствоҕа хаһаайыстыбаннай үлэ үгэс буолбут салааларын сырьетун, ойуур отонун туһаныллара былааннанар, ити олохтоох ресурсалары оҥорон таһаарыы тиһигин тэрийэн нэһилиэнньэни хаачыстыбалаах бородууксуйанан хааччыйыаҕа.
«Инньэ гынан хотугу эргимтэҕэ таһыыттан, онно оҥорон таһаарыыны олохтооһунтан саҕалаан, төттөрү тиэйиигэ тиийэ толору дьаһалы түмүктүүбүт. Ити саҥа үлэ миэстэлэрин үөскэтэр, ас -үөл тутулун бөҕөргөтөр уонна Арктика оройуоннарын экономикатын сайыннарыыга көмөлөһөр», — диэн Владимир Черноградскай бэлиэтээтэ.
This post was published on 21.10.2025 10:33 10:33