Арассыыйаҕа саҥа дьыллааҕы бырааһынньыктар уонна оскуола каникулларын кэнниттэн ОРВИ ыарыыта, быһа холоон, 1,5 төгүл үрдээбитэ бэлиэтэнэр. Ити үлэ уонна үөрэх кэлэктииптэрэ үлэ эрэһиимигэр киирбиттэрин кытта сибээстээх, диэн иһитиннэрэр Роспотребнадзор пресс-сулууспата.
Үһүс нэдиэлэҕэ 15,2 тыһ.кэриҥэ грипп түбэлтэтэ бэлиэтэннэ, ол ааспыт нэдиэлэ таһымыгар хаалла. Штаммнар ортолоругар уруккуттан баар А(H3N2) баһыйар.
2026 сыл бастакы оробуочай нэдиэлэтигэр COVID-19 ыарыыта кыратык үрдээбитэ бэлиэтэнэр — 5,4 тыһ.тахса түбэлтэ регистрацияланна.
Үөрэх тэрилтэлэригэр сэрэтэр сыалтан «сарсыардааҥы фильтрдар» ыытыллаллар. Роспотребнадзор оҕо ахсааныттан 20% респираторнай инфекцияларга хабылыннаҕына, үөрэх тохтотулларын санатта.
Роспотребнадзор гражданнарга доруобуйаларын туругар ордук болҕомтолоох буоларга уонна сэрэтэр дьаһаллары тутуһарга сүбэлиир: илиилэрин элбэхтик суунарга, дьиэлэри-уоттары салгытарга, үлэ миэстэтин уонна гаджеттарын дезинфекциялыырга, ыарыы бэлиэлээх дьону кытта сибээстэһэртэн куотунарга. Саамай кылаабынайа — бэйэни эмтээһининэн дьарыктаммакка, тыынар ыарыы ханнык баҕарар бэлиэлэрэ көһүннэхтэринэ медицинскэй көмө көрдүөххэ.
