Арассыыйаҕа футболга аан дойду чөмпүйэнээтэ саҕаланара чугаһаата. Ону кытары Европа дойдуларыгар Арассыыйа стадионнарыгар “суоһуур кутталтан” футболу сэргээччилэри сэрэтэр үлэлэрэ күүһүрдэ.
Маннык хабааннаах саба түһүүлэргэ Владимир Путин урут хардарбат эбит буоллаҕына, чөмпүйэнээт тэрээһинигэр анаммыт пресс-кэмпириэнсийэҕэ бэйэтин санаатын эттэ.
Владимир Владимирович, баар саба түһүүлэри аахайбакка, омук көрөөччүлэрэ Арассыыйаҕа төһө кыалларынан дьиэлэригэр курдук сананалларын ситиһиэхпит диэтэ. Дойду баһылыга “Санкция сүллүгэһэ Арассыыйаҕа эрэ туһулаан туттуллар буолбатах. Биллэн турар, маны тулуйуохха сөп”, — диэн эттэ.
Итинэн кини ханнык да санкциялар, провокациялар Арассыыйаҕа дьайбаттарын, олору тулуйуохха сөбүн өссө биирдэ итэҕэттэ.
Санатар буоллахха, ФИФА 21-с аан дойду чөмпүйэнээтин түмүктүүр түһүмэҕэ Арассыыйаҕа бэс ыйын 14 – от ыйын 15 күннэригэр буолар. Кыайыылааҕы быһаарар оонньуулар дойду 11 куоратын 12 стадионугар ыытыллыахтара.
Роман Попов, edersaas.ru
