Аппааны сэлиэнньэтигэр 776,72 кв.м иэннээх, толору хааччыллыылаах 12 квартиралаах таас дьиэ бастакы сыбаайата үөрүүлээх быһыыга-майгы түстэ. Тутуу үлэтин Алексей Пинигин салайааччылаах «Прогресс» ХЭТ сүрүннүөҕэ. «Хаарбах уонна саахалланар туруктаах дьиэттэн дьону көһөрүү» программанан Хатыҥ Арыы нэһилиэгэр бу 4-с дьиэ буолар.
Бастакы сыбаайа түһүүтүгэр алгысчыт Алексей Кривогорницын сахалыы сиэринэн аал уокка айах тутан үрдүк айыылартан көрдөстө, бар дьонун алҕаата. Үөрүүлээх тэрээһиҥҥэ улуус баһылыга Юрий Слепцов, Хатыҥ Арыы нэһилиэгин баһылыга Иван Ноговицын, «Прогресс» ХЭТ генеральнай директора Алексей Пинигин, «Намкоммунтеплоэнерго» АО генеральнай директора Николай Игнатьев, Нам улууһун прокурора Андрей Яковлев уонна саҥа дьиэҕэ киириэхтээх Аппааны сэлиэнньэтин Надежда Фролова эҕэрдэ тылларын эттилэр. Тыл этээччилэр бу программа тиһигин быспакка салҕанан иһэригэр, онно үлэ күүскэ ыытылларыгар олохтоох, улуус дьаһалталарыгар, Саха республикатын уонна Российскай Федерация Правительстволарыгар махталларын тиэртилэр.
Үлэ билиҥҥэттэн саҕаланан бу сыл 4-с кыбаарталыгар үлэҕэ киирэн, Аппааны олохтоохторо Саҥа дьылы саҥа таас дьиэҕэ көрсүөхтэрэ, суруйда «Нам улууһа» МТ пресс-сулууспата.
