«Айар» национальнай издательскай хампаанньа тылбаасчыта уонна эрэдээктэрэ Анжелика Эверстова саха народнай поэтессата Наталья Харлампьева «Прозрачное письмо» кинигэтин саха тылыттан тылбаастаабытын иһин «Эдэр автор» номинацияҕа «Тыл» национальнай бириэмийэ лауреата буолла. Наҕараадалааһын сиэрэ-туома Москва куоракка Малая Броннайга тыйаатырга ыытылынна.
Арассыыйа суруйааччыларын Сойууһа олохтообут бириэмийэтэ билиниллибит ааптардары да, эдэр талааннары да түмэр. Наҕараадалар сааһынан арахсар: “Маастар” (27 саастан үөһэ) уонна “Эдэр автор” (18-27 саастаахтар).
«Бу тус ситиһии эрэ буолбакка, саха тылбааһын оскуолатын үрдүк таһымын бигэргэтии, ону тэҥэ бүтүн Россиятааҕы культурнай пространствоҕа национальнай литературабытыгар интэриэс улаатан иһэрин бигэргэтии. Анжелика Эверстова курдук талааннаах эдэр ааптардар көмөлөрүнэн саха литературата нуучча тылыгар бэйэтин хатыламмат уратытын, күүһүн-уоҕун, ырааһын илдьэ харыстабыллаахтык, чуолкайдык иһиллэр. Анжеликаҕа салгыы айар-тутар ситиһиилэри, талбыт суолугар эрэллээх буолууну уонна саҥа чаҕылхай үлэлэри баҕарабын. Саха сирэ киэн туттар!»,- диэн Айсен Николаев телеграм-ханаалыгар суруйда.
Быйыл лауреаттар «Проза», «Поэзия», «Документальная литература», «Драматургия», «Художественный перевод» уонна «Литературная критика» номинацияларга биллэрилиннилэр.
Гран-при бириэмийэни режиссерга, Россия кинематографистарын Союһун бырабылыанньатын бэрэссэдээтэлигэр Никита Михалковка туттардылар.
This post was published on 09.02.2026 17:13 17:13