Балаҕан ыйын 9-10 күннэригэр Дьокуускай куоракка “Гражданскай уопсастыба: Кыайыы туһугар консолидация” диэн ис хоһооннох Гражданскай пуорум ыытылынна, суруйда Саха парламент саайт.
Пуорум буоларын курдук былаас уорганнарын, кэммиэрчэскэйэ суох тэрилтэлэри, түмсүүлэри, үөрэх эйгэтин бэрэстэбииллэрин, уопсастыбанньыктары түмтэ. Үгүс кыттаачччылаах тэрээһин чэрчитинэн биэс тиэмэнэн былаһааккалар үлэлээтилэр. Олортон биирдэстэринэн “Элбэх көлүөнэлээх дьиэ кэргэн – үгэстэр уонна олох сыаннастара” диэн буолла.
Былаһаакка модератора, СӨ дьахталларын түмсүүлэрин сойууһун бэрэссэдээтэлэ Анжелика Андреева санаатын маннык үллэстэр:
— “Элбэх көлүөнэлээх дьиэ кэргэн – үгэстэр уонна олох сыаннастара” былаһаакка олус таһаарылаахтык үлэлээтэ диэн сыаналыыбын. Былаас уорганнарын бэрэстэбиитэллэрэ, уопсастыбанньыктар, билим, үөрэх эйгэтин үлэһиттэрэ санааларын үллэһиннилэр, уопуттарын атастастылар.
Үлэ уонна социальнай харысхал миниистирэ Елена Волкова оҕолоох дьиэ кэргэннэри өйөөһүн араас миэрэлэрин сырдатта, ыытыллар бэлиитикэни кэпсээтэ.
Доруобуйа харыстабылын министиэристибэтиттэн бэрэстэбиитэллэр чөл олох туһунан билиһиннэрдилэр. Холобурдаан эттэххэ, араас гаджеттартан биир күн сынньалаҥы киллэрии тула кэпсэтии таҕыста. Киһи уйулҕа өттүнэн сынньанарыгар бу олус туһалаах буолуо этэ. Ол эрэн, улахан дьон сатаан гаджеттартан аккаастанар кыахпыт суох буоллаҕына, оҕону хайдах оннук санааҕа тиэрдэбит?
Оҕолоох эдэр ыаллары өйөөһүн билигин улахан оруолланан турар, ол иһигэр устудьуон ыаллары. Билигин биһиги кинилэргэ өйөбүл оҥоруубут туохтааҕар даҕаны туһалаах буолуо этэ диэн эттилэр.
Буоларын курдук, элбэх оҕолоох дьиэ кэргэннэри өйөөһүн боппуруоһун тула кэпсэттибит. Бу боппуруоһу дьахталлар түмсүүлэрэ Арассыыйа таһымыгар тиийэ кэпсэтэн, ырытан турабыт. Ол курдук, кэскилигэр үһүс оҕотун төрөөбүт ийэҕэ икки төгүллээх олоруу алын кээмэйинэн хамнас төлөнөрө буоллар, оҕолорун иитиитигэр төһүү күүс, демография тупсарыгар өссө биир үнүстүрүмүөн буолуо этэ.
Биһиги былаһааккабыт дьиҥ чахчы кэпсэтии, санаа атастаһыы сиринэн буолла. Манна туох даҕаны хааччаҕа суох араас этиилэри, идиэйэлэри киллэрдилэр. Холобур, элбэх ойохтонуу кытары этиллэ сырытта. Ол эрэн, тус бэйэм ону утарабын. Биһиги уопсастыбабытыгар табыллыбат дии саныыбын, уонна РФ Конституциятыгар сөп түбэспэт.
