Сайыҥҥылыы сылаас үтүө күннэри Саха сиригэр антициклон аҕалла. Ардаҕы үтэйдэ. Бу күннэргэ халлаан туругун УГМС салайааччытын солбуйааччыта — Гидрометкиин начаалынньыга Татьяна Маршалик кэпсээтэ.
«Өрөспүүбүлүкэни барытын кэриэтэ баһылаан турбут ардах циклона ааста. Антициклон кэллэ. Температура сылыйыаҕа. +22… +27 кыраадыһы күүтэбит», — диэтэ Маршалик.
Киин оройуоттарга уонна Дьокуускайга нэдиэлэ бастакы аҥарыгар +24… +26, миэстэлэринэн +28 кыраадыс. Чэппиэргэ кыра ардах, температура 5 кыраадыһынан намтыаҕа. Өрөбүллэргэ итийиэҕэ.
«Билигин Дьааҥыга уонна Томпоҕо баар итии арыый намырыаҕа. Халыма-Индигир оройуоттарыгар тиийиэҕэ. Нэдиэлэ бүтүүтэ Чукоткаҕа тиксиэҕэ. Дьааҥыга уонна Арктика кытылынан сөрүүдүйүө, сөҥүү түһүөҕэ уонна этиҥнээх буолуоҕа», — диэтэ кини.
This post was published on 30.07.2025 07:22 07:22